Megapolıstiń «Jasyl el» jasaǵynyń qataryndaǵy belsendiler sany jyldan jylǵa kóbeıip keledi. Ótken jyly ýaqytsha maýsymdyq jumyspen 14 pen 29 jas aralyǵyndaǵy 1900 jas qamtyldy. Bıyldan bastap bul meje 35 jasqa deıin dep ózgertildi. Bul týraly Almaty qalysynyń Óńirlik komýnıkasıalar qyzmetiniń alańynda «Jasyl el» jobasynyń jetekshisi Zýhra Imanbaeva men «Jasyl el» jobasynyń ekosaqshysy Murathan Taýasar aıtty, dep habarlaıdy almaty-akshamy.kz
«Jasyl el» – mektep oqýshylary, stýdent jáne jumyssyz jastardy maýsymdyq jumysqa ornalastyrýǵa, respýblıka boıynsha orman alqaptaryn qurýǵa, sol arqyly Qazaqstannyń ekologıalyq jaǵdaıyn jaqsartýǵa baǵyttalǵan joba. Joba Almaty qalalyq Jastar saıasaty máseleleri basqarmasynyń qoldaýymen júzege asyrylady.
«Álemdegi jahandyq ekologıalyq jaǵdaı kúrdelene túsýde, qorshaǵan ortany qorǵaý máselesi ózekti bolyp otyr. Ótken jyldyń qarashasynda Memleket basshysy Qasym-Jomart Toqaev almatylyqtarmen kezdesýinde: «Qorshaǵan orta azamattardyń densaýlyǵy men ómir súrý uzaqtyǵyna tikeleı áser etedi. Sondyqtan ekologıa máselesi árqashan meniń nazarymda». Sondaı-aq «Almaty qalasyn 2025 jylǵa deıin damytý baǵdarlamasy jáne 2030 jylǵa deıingi orta merzimdi perspektıvalar» bekitildi. Onyń basty kórsetkishteriniń biri – jyl saıyn keminde 10 000 jasty jumyspen qamtý kózdelgen», - dedi J.Imanbaeva.
Spıkerlerdiń aıtýynsha, «Jasyl el» jasaǵyndaǵylar qalany kógaldandyrýdan bólek, ekologıalyq semınarlar men trenıńterge, qalalyq jáne respýblıkalyq senbilikter men balalar úıi, qarttar úıi, ardagerler úılerindegi eko aksıalarǵa belsendi qatysady.
«Jobanyń oǵan qatysýshylar úshin berer artyqshylyqtary mol. Jastar bir-birimen tanysyp, qalanyń damýyna úlesterin qosady», -dep atap ótti M.Taýasar.
Sonymen qatar, jasaqta eko patrúlder qurylýda, olar qala aýmaǵynda reıdter júrgizip, ekologıalyq buzýshylyq faktilerin anyqtaıdy.