Mundaı jumys 1 773 almatylyq úı janyndaǵy dúkende júrgizildi, bul jalpy sannyń jartysyna jýyǵyn quraıdy. Bul týraly Baqytjan Saǵyntaevtyń tóraǵalyǵymen ótken Almaty qalasynyń tynys-tirshiligin qalpyna keltirý jónindegi qalalyq shtab otyrysynda ákimniń orynbasary Maqsat Qıqymov aıtyp berdi, dep habarlaıdy Almaty-akshamy.kz
Almatyda barlyǵy 3 583 V, S klasty azyq-túlik dúkeni jumys isteıdi: Alataý aýdanynda – 500 dúken, Almaly aýdanynda – 395, Áýezov aýdanynda – 605, Bostandyq aýdanynda – 488, Jetisý aýdanynda – 400, Medeý aýdanynda – 325, Naýryzbaı aýdanynda – 350, Túrksib aýdanynda – 525 dúken.
Baqytjan Saǵyntaevtyń tapsyrmasyn oryndaı otyryp, qala ákimdigi aýdandyq ákimdiktermen jáne Nur Otan partıasynyń ókilderimen birlesip kún saıyn úı janyndaǵy 1 773 dúkende ÁMAT baǵasynyń negizsiz ósýine jol bermeý boıynsha monıtorıń júrgizedi, bul jalpy sanynyń jartysyna jýyǵyn quraıdy.
Monıtorıń qorytyndysy boıynsha, 7 aýdannyń (Túrksib aýdanynan basqa) 61 dúkeninde ÁMAT baǵasynyń negizsiz ósý faktileri anyqtaldy.
M. Qıqymovtyń aıtýynsha, profılaktıkalyq jumystardyń nátıjesinde azyq-túlik taýarlarynyń kelesi túrleriniń baǵasy tómendedi: kúnbaǵys maıy 15%-ǵa (920-dan 780 tg/l), sút ónimderi 5%-ǵa (aıran 315-ten 300 tg/l, sút 295-ten 280 tg/l), áleýmettik nan 10%-ǵa (100-den 90 tg/l), 1 surypty un 10,2%-ǵa (245-ten 220 tg/kg-ǵa deıin), İ sanatty jumyrtqa 6,2% (490-dan 460 tg/ondyqqa deıin), qant 5,7%-ǵa (350-den 330 tg/kg-ǵa deıin).
Qalǵan 1 810 dúken boıynsha jumys aǵymdaǵy jyldyń qańtar aıynyń sońyna deıin júrgiziledi, monıtorıń boıynsha jumys turaqty negizde jalǵasady.