Baqytjan Saǵyntaevtyń tóraǵalyǵymen ótken Almaty qalasynyń tynys-tirshiligin qalpyna keltirý jónindegi qalalyq shtab otyrysynda Almaty ákiminiń orynbasary Maqsat Qıqymov budan basqa 120 iri ónerkásiptik kásiporyn men qalanyń 51 bazary da qaıtadan jumys isteı bastaǵanyn málimdedi, dep habarlaıdy Almaty-akshamy.kz.
Ákim orynbasarynyń aıtýynsha, 149 azyq-túlik saýda jelisiniń gıpermarketteri men sýpermarketteriniń 146-sy óz qyzmetin qalpyna keltirgen, qalǵan 3-eýi 28 qańtarǵa deıin ashylady.
Almatynyń azyq-túlik emes saýda nysandaryna keletin bolsaq, búginde 110 nysannyń 99-y óz qyzmetin jandandyrdy, qalǵan 11-i aqpan aıynyń sońyna deıin jumysyn bastaıdy.
Búginde qalanyń 93 saýda-oıyn-saýyq ortalyqtary men saýda úıleriniń 87-si jumys isteıdi, qalǵan 6 nysan qalpyna keltirý qyzmetin júrgizedi. Mysaly, «Máskeý» SOSO jartylaı iske qosyldy, tolyq qalpyna keltirý aqpan aıynyń ortasyna deıin josparlanǵan.
Basqa da zardap shekken saýda úılerine keler bolsaq, «Arena» SÚ 1 aqpanda, «Sıtı Sentr» SO 1 aqpanda, «Mobılka» SÚ aqpan aıynyń sońyna deıin, «Promenad» SO naýryz aıynyń sońyna deıin, «Azıa park» SOSO naýryzdyń 1 onkúndigine deıin, «Almaly» SOSO tamyz aıynyń sońyna deıin ashý josparlanýda.
Maqsat Qıqymovtyń aıtýynsha, búginde Almatyda 220 janar-jaǵarmaı quıý beketteriniń 190-y jumys isteıdi, 23 jelilik janar-jaǵarmaı quıý beketteri zaqymdanýdy qalpyna keltirip, aqpan aıynyń sońyna deıin iske qosylady, órtengen 2 JJQB mamyr aıynyń ortasyna deıin óz qyzmetin qalpyna keltirýdi, 5 jelilik emes janar-jaǵarmaı quıý beketi 30 qańtarǵa deıin óz qyzmetin qalpyna keltirýdi josparlap otyr.
Qaladaǵy 3 100 qoǵamdyq tamaqtaný obektileriniń basym bóligi - 3 083-i jumys isteıdi. Naýryz aıynyń ortasyna deıin 15 nysan, 1 mamyrǵa deıin taǵy 2 nysan iske qosylady.
Qalada 975 dárihana qyzmetin qaıta bastady.