Erjan Erkinbaev Almatyny 2023-2024 jyldary SHYU-nyń mádenı jáne týrızm astanasy retinde bekitýdi usyndy.
17 naýryzda Úndistannyń Varanası qalasynda Shanhaı Yntymaqtastyq Uıymy memleketteriniń týrısik ákimshilikteri basshylarynyń kezdesýi ótti. Qazaqstandyq delegasıany QR Mádenıet jáne sport vıse-mınıstri Erjan Erkinbaev basqardy, dep habarlaıdy Almaty-akshamy.kz mınıstrliktiń baspasóz qyzmetine silteme jasap.
İs-sharaǵa Úndistan, Qytaı, Qyrǵyzstan, Ózbekstan, Tájikstan, Reseı men Pákistan ókilderi qatysty. Taraptar SHYU elderinde týrızm salasyndaǵy yntymaqtastyqty nyǵaıtýǵa jáne osy ındýstrıany birlesip damytýǵa baǵyttalǵan birneshe qujatqa qol qoıdy.
Vıse-mınıstr aıtqan usynystardyń biri iri halyqaralyq is-sharalar alańdarynda, onyń ishinde biryńǵaı stendterde SHYU memleketteriniń týrısik áleýetin ilgeriletýdegi kúsh-jigerdi biriktirý boldy. Sondaı-aq Erjan Erkinbaev Almatyny 2023-2024 jyl aralyǵynda SHYU-nyń mádenı jáne týrısik astanasy etýdi usyndy.
«Búgingi tańda SHYU elderimen barlyq salalarda yntymaqtastyqty damytý men nyǵaıtýdyń oń serpini baıqalady, týrızm de solardyń qatarynda. Qazirgi ýaqytta Qazaqstanda vızasyz rejım 79 eldiń azamattary úshin jumys isteıdi (SHYU-ǵa múshe barlyq memleketterdi qosa alǵanda), osy tizimdi 100 elge deıin jetkizý boıynsha jumys júrgizilýde, sondaı-aq 100-den astam áýe joldary boıynsha 30 memleketpen tikeleı áýe qatynasy bar», - dedi Erjan Erkinbaev.
Aıta ketý kerek, 2023 jyldyń shildesinen 2024 jyldyń shildesine deıin Qazaqstan Shanhaı Yntymaqtastyq Uıymyna tóraǵalyq etedi.