Alataý aýdanynda Almaty ákimi Erbolat Dosaevtyń halyqpen kezekti kezdesýi ótti. Qala basshysy aýdannyń damýy jáne turǵyndardan túsken usynystar boıynsha atqarylǵan jumystar týraly aıtyp berdi. Kezdesýge 300-den astam adam keldi, dep habarlaıdy Almaty-akshamy.kz.
Aýdanda komýnaldyq ınfraqurylymdy jańǵyrtý ózekti másele bolyp qala beredi. Aǵymdaǵy jyldyń tamyz aıynda "Aqbulaq" shaǵynaýdanynda uzyndyǵy 29 km ortalyq jeliler iske qosyldy, bul 1,5 myń jeke úıdi aýyz sýmen jáne kárizben qamtýǵa múmkindik berdi. Jyl sońyna deıin «Ójet», «Samǵaý», «Shapaǵat». shaǵynaýdandaryndaǵy jeliler aıaqtalady. 2023 jyldyń sáýir aıynda "Terekti", "Bolashaq", "Túrkistan" jáne "Rahat-Mádenıet" shaǵynaýdandarynda 239 km sýmen jabdyqtaý jáne sý burý jelileriniń qurylysy bastalady, aıaqtalý merzimi - 2024 jyldyń jeltoqsan aıy. Nátıjesinde komýnaldyq ınfraqurylymǵa 5 myńnan astam úıler qosylady.
Qala ákimi Erbolat Dosaevtyń aıtýynsha, aýdandaǵy joldardyń paıdalaný sıpattamalaryn jaqsartý úshin jalpy uzyndyǵy 42 km bolatyn 53 kóshege ortasha jóndeý jumystary júrgizilýde. Búginde Rysqulov, Raıymbek dańǵyldary, Jańa Saın, Ótemisuly kósheleri, sondaı-aq "Darhan", "Saıaly", "Uljan", "Ójet", "Kók-Qaınar" sh/a boıynsha jumystar aıaqtaldy. Jyl sońyna deıin "Alǵabas" jáne "Aqbulaq" shaǵynaýdandaryndaǵy joldarǵa ortasha jóndeý jumystary aıaqtalady.
Aýdanda jaýyn-shashyn kezinde sý basý máselesi ózekti bolyp qala beredi. Osy máseleni sheshý úshin aǵymdaǵy jyly turaqty sý basýdyń 7 ýchaskesinde aryqtardy salý jáne rekonstrýksıalaý boıynsha jobalar aıaqtaldy. 3 kolektor qalpyna keltirilip, uzyndyǵy 955 m. aryq jelisi salyndy. Jyl sońyna deıin taǵy 11 sý basý ýchaskesinde jumystar aıaqtalady.
Aǵymdaǵy jyldyń kókteminde avtobýs parkin jańartý máselesi boıynsha ákimdik 450 jańa avtobýs satyp aldy, onyń 92-si Alataý aýdanyna berildi. Osylaısha, aýdannyń avtobýs parki tolyǵymen jańartyldy.
Oqýshy oryndarynyń tapshylyǵy máselesin sheshý úshin 1 qyrkúıekte 4800 oryndyq 3 jańa mektep ashyldy. Bul Almaty qalasyndaǵy jalǵyz úsh aýysymdy mektep máselesin túpkilikti sheshýge múmkindik berdi. 3000 oryndyq taǵy 2 mektep jyl sońyna deıin paıdalanýǵa beriledi. Sonymen qatar, "Saıaly-2", "Zerdeli" jáne "Samǵaý" shaǵynaýdandarynda 2600 oryndyq 3 jańa mektep salý jumystary júrgizilýde.
Mektepke deıingi uıymdardaǵy tapshylyqty qysqartý maqsatynda aǵymdaǵy jyldyń tamyz aıynda "Saıaly" shaǵynaýdanynda 160 oryndyq balabaqsha qurylysy bastaldy. Qurylysty aıaqtaý 2023 jyldyń naýryzyna josparlanǵan.
Alataý aýdanynyń turǵyndary úshin sporttyq nysandarmen qamtamasyz etý jumystary jalǵasýda. Aǵymdaǵy jyldyń naýryz aıynda jeke ınvestordyń qarajaty esebinen Ústel tenısi ortalyǵy ashyldy, oǵan qazir kún saıyn 50 bala keledi. "Zerdeli" shaǵynaýdanynda dene shynyqtyrý-saýyqtyrý kesheniniń, al "Nurkent" shaǵynaýdanynda tenıs kortynyń qurylystary qosymsha júrgizilýde. Bul sport keshenderi 2023 jyldyń jeltoqsanynda ashylatyn bolady.
2023 jylǵy maýsymǵa deıin "Saıaly", "Qarasý" shaǵynaýdandarynda medısınalyq qyzmet kórsetýdiń qadamdyq qoljetimdiligin qamtamasyz etý úshin kúnine 200 adam keletin eki dárigerlik ambýlatorıa salynady.
Sonymen qatar, qala ákimi Erbolat Dosaev «Halyqtyń búdjetke qatysýy» baǵdarlamasynyń iske asyrylý barysy týraly habardar etti. Bıyl aýdanda 24 joba aıaqtaldy. Bul 12 fýtbol, 7 basketbol, 6 voleıbol alańy, balalar alańy jáne workout alańdary. Búgingi tańda 18 joba boıynsha jumystar júrgizilýde (6 skver jáne 12 balalar jáne workout alańdary).
Almaty ákimimen kezdesý barysynda turǵyndar joldardy jóndeý, káriz jáne elektr jelilerin abattandyrý jáne t. b. máselelerdi kóterdi.
Memleket basshysy Qasym-Jomart Toqaevtyń Jarlyǵymen bekitilgen halyqpen kezdesýdiń jańa formatyna sáıkes, jyl sońyna deıin Erbolat Dosaev halyqpen 24 kezdesý ótkizedi – 8 aýdannyń árqaısysynyń turǵyndarymen toqsanyna bir kezdesý.