3 qarashada keshki saǵat 18:30 shamasynda "102" arnasyna 11 jastaǵy Saıana esimdi qyzdyń joǵalǵany týraly habar kelip túsken. Sabaqtan shyqqannan keıin úıine oralmaǵan qyzdy ata-anasy, týǵan-týysy men 200 polıseı izdegen, - dep habarlaıdy aqshamnews.kz tilshisi.
Abaı oblysynyń polısıa departamentiniń málimetinshe, kóshede adasyp júrgen qyzdy Farıza esimdi boıjetken taýyp alyp, polısıaǵa habarlasqan.
"Sabaqtan keıin úıine qaıtpaǵan qyzdy izdeýge qala polısıasynyń barlyq qyzmetteri jumyldyryldy. Beınebaqylaý kameralary men izdeý jumystary arqyly Saıana birneshe kósheden ótkenin bildik. Semeı qalasynda turatyn Farıza esimdi azamatshany qyraǵylyq tanytyp, jalǵyz júrgen qyzdan jón suraǵan. Onyń qyraǵylyǵynyń arqasynda qyzdy aman-esen ata-anasyna tapsyrdyq", - dep habarlaıdy Abaı oblysynyń polısıa departamenti.
Polısıa departamentiniń basshylyǵy 11 jastaǵy qyzdy taýyp bergen boıjetkenge alǵys jarıalamaq.