Мен көпқабатты үйде тұрамын. Жақында өз еркіммен үйдің қабырғасын бұзып, есікті басқа жақтан шығарып, біраз жөндеу жұмыстарын жүргіздім. Алайда, «құрылыс жүргізу үшін арнайы құзырлы органнан рұқсат алу керек» дегенді естідім. Осы рас па? Үйге рұқсатсыз жөндеу жұмыстарын жүргізгенге қандай жаза қолданылады?
Сапарәлі ПӘТТЕЕВ,
Алматы қаласы.
Негізі, рұқсат алмай жатып, үйді жабдықтауға болмайды. Рұқсатты кейін ала саламын ғой деп немқұрайдылыққа салынудың арты үлкен өкінішке әкеліп соқтыруы мүмкін. Мұндай кезде Қала құрылысын бақылау басқармасы рұқсат қағазды бермейді. Өйткені, бақылау басқармасы болғаннан кейін, олар қандай да болсын жүргізілген құрылысты заңдастырып, қабылдап алуы керек. Сейсмикаға қауіптілігін тексереді. Осының барлығы қадағаланбай жатып рұқсат бере алмайды. Сондықтан үйді өзгертпес бұрын жергілікті Қала құрылысын бақылау басқармасынан рұқсат алған жөн. Оның еш қиындығы жоқ. Тек қана төрт-ақ құжат керек: жеке куәлігі, үйдің құжаты, жобалау-сметалық құжаттамаға сараптаманың оң қорытындысының көшірмесі, сондай-ақ құрылыс жасайтын мердігердің лицензиясының болуы. Міне, бары – осы.
Егер рұқсат алмай тұрып пәтерді, мекемені өзгертіп қойған жағдайда тексеру жүргізіп, әкімшілік жазаға тарту көзделеді. Айыппұл салынады. Сонымен қатар, тиісті орыннан рұқсат алмай тұрып объектіні өзгерткен адамға пәтерін сатқан жағдайда немесе пәтерін кепілге қойып несие алғысы келсе, тиісті органдар рұқсат бермейді.