Жеңіс күніне 5 күн қалды. «Бауыржан шиыршығы»
9 мамыр қарсаңында Мәдениет және ақпарат министрлігі Ұлы Отан соғысында қазақстандықтардың жеңіске қосқан үлесі туралы жазбалар циклын жариялап жүр. Бүгінгі цикл «Кеңес Одағының Батыры» Бауыржан Момышұлының майдандағы ерлігіне арналған, деп хабарлайды aqshamnews.kz.
Бауыржан Момышұлы Ұлы Отан соғысы майданына тура Мәскеу үшін шайқастың қызған кезінде келді. Ол Алматыда құрылған генерал Иван Васильевич Панфилов басқарған 316-шы атқыштар дивизиясына түсті.
Бауыржан Момышұлы сол кезде офицерлік шенге ие болған, сондықтан бірден батальон командирі қызметіне тағайындалды. Ал 316-шы дивизияны тікелей Мәскеуді қорғауға жіберді.
Вермахттың қатты шабуылы кезінде жауды тоқтатып, әскердің жеке құрамын сақтап қалу үшін ерекше тактикалық амалдар керек болды.
Содан бері «Бауыржан шиыршығы» деп аталатын тактика ел есінде қалды. Оның мәні мынадай еді: жаудың шабуылдаушы колоннасына кенеттен соққы беріп, ұзақ соғысқа бармай, шегініп отырған. Осылайша жаудың күші біртіндеп әлсіреген. Сол кезде қайта соққы беріп, сол соққы жеңіске жеткізген.
Жас қазақтың тактикасымен бетпе-бет келген генерал Гёпнер Гитлерге жолдаған баяндамасында былай деп жазған:
«Ешқандай соғыс заңдары мен ережелерін мойындамайтын, жабайы дивизия. Оның сарбаздары берілмейді, ерекше фанатизммен соғысады және өлімнен қаймықпайды».
Бауыржан Момышұлы бірнеше рет қоршауда қалған, бірақ әр жолы әскерін де, оған сеніп тапсырылған бөлімдердің жауынгерлік қабілетін де сақтап, сәтті шыға білді.
«Бауыржан шиыршығы» бүгінге дейін АҚШ пен Израильдің әскери оқу орындарында қоршаудан шығу кезіндегі жауынгерлік іс-қимыл үлгісі ретінде оқытылады.
Бауыржан Момышұлына «Кеңес Одағының Батыры» атағы тек 1990 жылы, қайтыс болғаннан кейін берілді. Ол 1982 жылы дүниеден өтті.