Алматы қаласында жақын арада жедел жәрдем қызметінде смарт-бейнежетондар қолдану жоспарланып отыр.
Бұл құрылғылар медицина қызметкерлерінің қауіпсіздігін арттыру мақсатында енгізілуде. Қазірдің өзінде аталған технология елордада бес жедел жәрдем бригадасында пилоттық режимде сынақтан өтіп жатыр, деп хабарлайды aqshamnews.kz.
Смарт-бейнежетондар қоңырауларды бейнетіркеуге мүмкіндік береді және төтенше жағдай туындаған кезде жедел әрекет ету құралы ретінде қызмет атқарады.
Аталған шешім – Қазақстанның денсаулық сақтау жүйесін цифрландыру аясында қолға алынған бірқатар жобалардың бірі. Денсаулық сақтау министрлігінде ведомство басшысы Ақмарал Әлназарова мен «Қазақтелеком» АҚ Басқарма төрағасы Бағдат Мусиннің қатысуымен өткен кездесуде жасанды интеллект қолданылатын цифрлық жобалар кеңінен талқыланды.
Ұсынылған бастамалар қатарында:
• «ЖИ-терапевт» жүйесі. Ақмола облысының медициналық ұйымдарында сынақтан өтіп жатқан бұл сервис дәрігер мен пациент арасындағы диалогты нақты уақыт режимінде талдап, 80% дәлдікпен алдын ала диагноз қоя алады. Сондай-ақ дәрігердің құжат толтыру уақытын 40%-ға қысқартады.
• Қашықтан бақылауға арналған телемедициналық қосымша. Қазақстандықтар бұл қосымшаның көмегімен қан қысымын, жүрек соғысын, дене температурасын, қандағы оттегі мен глюкоза деңгейін өлшей алады. Аталған шешім әсіресе ауылдық жерлердегі медициналық қызметтің қолжетімділігін арттыруға бағытталған.
Кездесу соңында тараптар медициналық инфрақұрылымды цифрландыру мен пилоттық жобаларды кеңейтуге уағдаласты.
Бағдат Мусиннің айтуынша, «Қазақтелеком» АҚ медицина ұйымдарына бейнебақылау, қолжетімділікті бақылау, дабыл батырмасы және полицияның жедел басқару орталықтарымен интеграцияланған бейнетаспа жүйесі сынды қауіпсіздік құралдарын ұсынуға дайын.
Ақмарал Әлназарова:
«Медицина қызметкерлерінің қауіпсіздігі мен жұмыс тиімділігі – басты басымдық. Күзет, шұғыл әрекет ету жүйелері және телемедицинаға қатысты жобалар денсаулық сақтау саласындағы өзекті сын-қатерлерге нақты жауап береді», — деп атап өтті министр.