Алматыда Республика күні қарсаңында Құрылыс басқармасы тарапынан балабақшалар мен мектептердің жаңа ғимараттарын салу, күрделі жөндеу және қайта жаңарту жұмыстары аяқталды, - деп хабарлайды Aqshamnews.kz.
Бостандық ауданында есту қабілеті бұзылған балаларға арналған №137 түзету балабақшасы мен №87 балабақшада сейсмикалық нығайту және күрделі жөндеу жүргізілді. Сондай-ақ, 240 орындық жаңа балабақша ғимараты қайта жаңғыртылды. Жаңартылған нысандар заманауи топтық бөлмелермен, музыкалық және дене шынықтыру залдарымен, медициналық және тұрмыстық блоктармен жабдықталған. Барлық ғимарат балаларға жайлы әрі қауіпсіз болуына толықтай бейімделген.
Осы ауданда №73 мектеп-гимназиясы жаңартылды. Жоба аясында ғимараттың құрылымдары нығайтылып, қасбеті жылытылды, инженерлік жүйелер, шатыр және ішкі әрлеу толық жаңартылды. Мектепте заманауи оқу кабинеттері, кітапхана, медиатека және акт залы жасақталды.
Медеу ауданында балабақша ғимаратына сейсмикалық күшейтумен бірге күрделі жөндеу жүргізілді. Ішкі кеңістік жаңартылып, тәрбиеленушілер мен педагогтар үшін жайлы жағдай жасалды. Балаларға арналған ойын және ұйқы бөлмелері, ас блогы мен медициналық бөлім жабдықталды.
Наурызбай ауданында №174 мектеп-гимназиясына жаңа қосымша ғимарат салынды. Заманауи нысан мультимедиялық кабинеттермен, спорт залымен, буфетпен және демалыс аймақтарымен қамтылған. Сабақ өтетін бөлмелер жаңа техникалық құралдармен және интерактивті панельдермен жабдықталып, білім беру сапасын арттыруға мүмкіндік береді.
Барлық нысан қауіпсіздік, энергия үнемділік және жайлылықтың заманауи талаптарына толық сәйкес келеді. Бұл жобалардың жүзеге асырылуы Алматы қаласының әлеуметтік инфрақұрылымын дамытудағы маңызды қадам болып табылады.