Алматыдағы Әбілхан Қастеев атындағы ҚР Мемлекеттік өнер музейінде қазақ өнеріндегі мал шаруашылығының символизмін көрсететін ерекше көрме өтті. «Qunart: қазақ өнеріндегі қой бейнесінің тарихы» экспозициясы дәстүр мен заманауилықты шебер ұштастыра отырып, Қазақстанның мал шаруашылығы мен мәдениетіне назар аудартатын Qunar+ реалити-шоуының лайықты жалғасы іспетті.
Көрме – қазақ халқының өміріндегі ең маңызды тақырыптардың бірі мал шаруашылығын визуалды түрде бейнелейтін бірегей жоба. Қой шаруашылығы көшпелі халық үші ғасырлар бойы басты кәсіп болды, ал шексіз дала мен жартылай шөлейт жайылымдар қой өсіруге өте қолайлы жағдай жасады. Бұл кәсіп ата-бабамызды етпен, жүнмен, сүтпен, терімен қамтамасыз етіп қана қоймай, осы өнімдерді көршілес отырықшы халықтармен айырбастауға да мүмкіндік берген.
Көркем жобаның басты ерекшелігі – Ә.Қастеев атындағы ҚР Мемлекеттік өнер музейінің қорындағы бірегей коллекциясымен жұмыс істеу болды. Көрменің кураторы Оля Веселова музей қорында сақталған туындыларды мұқият зерттеді. Нәтижесінде көрмеге сирек қойылатын әрі көрермен назарына жиі іліге бермейтін шығармалар таңдалды. Олардың қатарында Әбілхан Қастеев, Анарбек Нақысбеков, Константин Плюхин, Сахи Романов,
Әбдірашит Сыдыханов, Ғани Баянов, Бақыт Бәпишев, Айша Ғалымбаева, Молдахмет Кенбаев, Жанатай Шарденов және басқа да суретшілердің туындылары бар.
Сонымен қатар, көрмеге Айжан Бекқұлова, Шамиль Гулиев, Бақыт Бүбіқанова, Алмагүл Меңлібаева, Саид Атабеков, Сәуле Дюсенбина, Мұратбек Тұрбай, Әнуар Мүсірепов, Ләйлә Жарқын сынды қазіргі заманғы отандық суретшілер де қатысқан.
«Qunar» жобасы арқылы біз фермерлік пен ауыл тұрмысына жаңаша бағытта қарау өткеннің емес, болашақтың ісі екенін көрсеткіміз келеді. Qunar+ реалити-жобасын қазақ тілінде жасағанымыз да сондықтан. Ата-бабамыздың дауысы өз тілімізде шынайы естіліп, бүгінгі ұрпаққа күш берсін дейміз. Qunar реалити-жобасының идеясын қолға алғанда бізді бір статистика қатты ойландырды: 1990 жылы Қазақстанда 9,8 миллион ірі қара мен 36 миллион ұсақ мал болған. Қазір бұл көрсеткіш – 8,5 пен 21 миллион ғана. Бұл жай сандар емес, бұл бізге ой салатын, әрекетке итермелейтін шындық. Біз болашақты ойласақ, бүгіннен бастауымыз керек, – дейді «Qunar Creative» қоғамдық бірлестігінің негізін қалаушы және жоба жетекшісі Ақерке Татишева.
