12 мамырда бүкіл әлемдегі мейіргерлер өздерінің кәсіби мерекесін – Халықаралық мейіргерлер күнін атап өтеді. Медициналық ұйымдардың қызметін дәрігерлердің ғана емес, пациенттердің де бас көмекшісі болып табылатын мейіргерсіз елестету мүмкін емес.
«Кардиология және ішкі аурулар ғылыми-зерттеу институтының барлық мейіргерлері жылы лебіздер мен шынайы алғыс сөздерге лайық. Мейіргерлердің жұмысы дәрі-дәрмектерді беру немесе өмірлік маңызды көрсеткіштерді тексеру ғана емес, олар пациенттің қалпына келу процесінің әр кезеңінде де жанынан табылады. Мейіргерлік күтім – сапалы және қауіпсіз медициналық қызмет көрсетудің негізі. Мейіргерлердің денсаулық сақтау жүйесіндегі рөлі клиникалық дағдыларды, көшбасшылықты, бейімделуді және эмоционалды тұрақтылықты қажет ете отырып, одан әрі артып отыр», – дейді Кардиология және ішкі аурулар ҒЗИ Басқарма төрағасы Марат Пашимов.
Аталмыш институттағы мейіргерлер – әр пациентке уақытылы және жан-жақты көмек көрсететін клиникалық топтың ажырамас мүшелері. Олардың өз ісіне адалдығы күнделікті өмірде ғана емес, сонымен қатар пациенттердің қажеттілігін қалай болжайтындығында және медициналық көмектің ең жоғары стандарттарын сақтауында көрінеді.
Мысалы, 2024 жылы JCI аккредиттеуден қайта өту кезінде халықаралық сараптама комиссиясының аудиторлары клиниканың дәрігерлерінің және де мейіргерлерінің кәсіби біліктілігінің жоғары әлеуетін растады. JCI стандарттары бойынша ұйымдағы барлық бөлімше мен процестер бағаланды: дәрігер мен мейіргерлік күтімнен бастап ғимараттың қауіпсіздігіне, инфекциялық бақылауға, дәрі-дәрмекпен жұмыс істеуге, пациенттің құқықтарын сақтауға дейін. Аудиторлар мейіргерлер мен дәрігерлердің тиімді топтық жұмысын атап өтті.
Мейіргер – бұл жанашырлық пен адалдыққа негізделген денсаулық сақтау саласының ерекше нәзік, бірақ күшті жақтарының бірі. Ол – адамзатты сауығуға жетелейтін аяулы жан.
"Біздің миссиямызға сәйкес, институттың қызметі денсаулық сақтау жүйесінің ғылым, білім мен практикасының үштұғырлығы қағидаты шеңберінде жүзеге асырылады. Осы тұрғыда, мейіргер мамандарына үздіксіз білім беру шеңберінде біз медицинадағы заманауи стандарттар мен жаңа технологияларды ескере отырып, формальды/формальды емес оқыту бағдарламаларын енгізудеміз, сондай-ақ пәнаралық өзара іс-қимыл және командалық жұмыс дағдыларын дамытудамыз. Мейіргер ісінің әртүрлі салаларындағы сарапшылардың қатысуымен пациенттерге күтім жасаудың және заманауи медициналық құрылғыларды пайдаланудың жаңа әдістемелері бойынша тренингтер, семинарлар мен шеберлік кластарын өткіземіз. Мейіргерлер кәсіптік аурулардың алдын алу және созылмалы науқастарға күтім жасау мәселелері бойынша үздіксіз біліктілігін арттыруда. Оларды симуляциялық тренингтер арқылы практикалық даярлау қамтамасыз етіледі. Мұндай шаралар мейіргерлердің кәсіби деңгейін арттыруға, денсаулық сақтаудың қазіргі заманғы талаптарына сәйкес медициналық қызмет көрсету сапасын жақсартуға ықпал етеді", – деді М.Пашимов.
