Алматыда есту және көру қабілеті бұзылған адамдарға жеті кітапхана қызмет көрсетеді.
Олардың ақпаратқа ыңғайлы қол жеткізуі үшін заманауи жабдықтармен қамтамасыз етілген. Өңірлік коммуникациялар қызметінің брифингінде атқарылған жұмыстар мен даму перспективалары туралы «Алматы қаласының орталықтандырылған кітапхана жүйесінің» директоры Мейрам Бектембаев айтып берді.
«Бұл кітапханаларда мәтінді тактильді форматта шығаратын Брайль дисплейлері, Брайль басып шығаруға арналған принтерлер, мәтіннің контрастын үлкейтуге және өзгертуге арналған құрылғылар және мәтінді оқитын, оны дауыстап ойнататын және аудио форматқа аударатын сканерлер бар», – деді ол.
Аудиокітаптарды тыңдау ыңғайлы болу үшін кітапханаларда дыбыс сапасы жоғары құлаққаптар да бар. Сонымен қатар, бейімделген бағдарламалық жасақтамасы бар компьютерлер орнатылған, бұл көру және есту қабілеті нашар адамдарға ақпаратпен тиімді жұмыс істеуге көмектеседі.
Есту және көру қабілеті бұзылған адамдар келесі кітапханаларға бара алады: Жамбыл атындағы ҚЖК, «Alatau Creative Hub», Чехов атындағы ОҚК, Қазақстан жазушыларының кітапханасы, сондай-ақ ресурстарды пайдалану кезінде олардың ыңғайлылығы мен жайлылығы үшін барлық жағдайлар жасалған №4, 14 және 45 филиалдар. Бастама Алматы әкімінің тапсырмасы бойынша мәдени нысандарға тең қол жеткізу және кедергісіз орта құру қағидаты шеңберінде іске асырылды.
Айта кетейік, бұл кітапханаларда көру қабілеті нашар қызметкерлер жұмыс істейді және оқырмандарға жабдықты игеруге, қажетті ресурстарды іздеуге және оқуға көмек көрсетеді. Бұл жұмыс орындарын құруға және қаланың барлық тұрғындары үшін мәдениет пен білімге қол жетімділіктің қосымша мүмкіндіктерін жасауға мүмкіндік береді.
Жалпы, қалада әкімдік жанынан 30-ға жуық кітапхана жұмыс істейді және оның 95% - ы жаңғыртылған. Жыл сайын Алматы кітапханаларына баратындардың жалпы саны 3 миллионнан асады.