Алматыда 2030 жылға дейін тағы 20 жаңа кітапхана ашылады.
Бұл ретте жоспар қаланың кітапхана тапшылығы бар шалғай аудандарына бағытталатын болады, деп хабарлайды akshamnews.kz
Сонымен қатар, саябақтарда, скверлерде және сауда орталықтарында кітапхана павильондары ашылатын болады. Осылайша, Алматы біздің елімізде мұндай рухани жобаны жоспарлап ұсынуға дайын алғашқы қала болып отыр.
Бұл орайда Мәдениет басқармасында кітапхана саласы мен басқа да шығармашылық шешімдер туралы айтылды. БАҚ өкілдері үшін кітапханалар бойынша баспасөз туры ұйымдастырылды. Айта кетейік, биыл Алматы кітапханалары 40 жылдығын атап өтуде.
Қазір мәдени астанамыз Алматыда 28 қалалық кітапхана бар. Оның ішінде үш филиал тәулік бойы жұмыс істейді. Оқырмандар үшін қолайлы жағдайлар
жасалған: кітап қоры үнемі жаңартылып отырады. Мұнда жылдам тегін интернет жұмыс істейді, компьютерлер, жұмыс үстелдері бар.
Сонымен қатар, көру қабілеті нашар және зағип оқырмандар кітапханалардың арнайы қызметтерін пайдалана алады. Ол үшін «Брайль» пернетақталары, арнайы экрандық үлкейткіштер және сканерлер бар. Олар кітаптардың мазмұнын бірден «брайльға» аударуға көмектеседі.
«Біз қаламыздың зағиптар қоғамымен, сондай-ақ түрлі инклюзивті ұйымдармен тығыз ынтымақтастық жасаймыз. Сонымен қатар, балалардың кітап оқуға деген ынтасын арттыру бойынша жұмыстар жүргізілуде. Ол үшін тегін тіл үйірмелерін, геймификация элементтері бар түрлі іс-шараларды ұйымдастырамыз, зиялы тұлғаларды, өнер жұлдыздары мен қаламгерлерді шақырамыз. Бізде барлығы 140 үйірме бар. Жалпы, қалалық кітапханалардың 95% - ы жаңғыртудан өтті. Әрбір кітапханамыз балалар мен ересектер үшін жан-жақты даму орталығы болып табылады. Осының арқасында қалалық кітапханаларға келушілер саны жыл сайын 3 миллионнан кем емес", - деп атап өтті Алматы қаласының орталықтандырылған кітапхана жүйесінің директоры Мейрам Бектембаев.
Қаланың орталықтандырылған кітапхана жүйесіндегі кітап қоры 1 300 000 данадан асады, оның 18% - ы толығымен цифрланған. Сонымен қатар, кітап каталогы ОКЖ сайтында орналастырылған және барлық оқырманға қолжетімді. Сондай-ақ, қазіргі уақытта мүмкіндігі шектеулі азаматтар үшін үйге кітап жеткізу қызметі тестілеуден өтіп жатыр.
Баспасөз туры барысында журналистер кітапхана қызметкерлерімен жүздесіп, түрлі филиалдарға барып, қорда сақталған басылымдармен танысты. № 10 кітапхана меңгерушісі Надежда Тен кітапханалардың халықаралық ынтымақтастығы туралы айтып берді. Алматы кітапханашылары биыл Швейцария, Германия, Жапония, Оңтүстік Корея және Грузияның жетекші кітапханаларында біліктілігін арттырудан өтті.
«Кітапханашылардың біліктілігін арттыру және тәжірибе алмасу мақсатында қызметкерлеріміз әлемнің жетекші білім беру орталықтары мен кітапханаларына тағылымдамадан өтуге және оқуға жіберіледі. Мен өзім Оңтүстік Кореяда тағылымдамадан өттім. Біз Старфилд, Намсан сияқты әйгілі кітапханаларға, сондай-ақ университет пен балалар кітапханаларына бардық. Келгеннен кейін алған барлық білімімізді салыстырып, өз әсерлерімізбен бөлістік. Шетелде алған идеяларымыз бен білімдерімізді Әкімдік қалалық кітапханаларға енгізе бастады. Бұл керемет»,- деді ол.
Қазір қалалық кітапханаларда автоматтандырылған ақпараттық-кітапханалық жүйе іске қосылды, оны енгізу нәтижелі мүмкіндіктерге жол ашты. Мәселен, электрондық оқырман билетін беру, оқырмандардың сұраныстарын өңдеу, қажетті әдебиеттерді іріктеу, тапсырыс беру және резервтеу, кітаптарды автоматтандырылған режимде беру және қайтару, кітапханалық-ақпараттық технологияларды кешенді автоматтандыру жүйелері іске қосылды.