Алматы қаласының Азаматтық альянсы алаңында Ядролық физика институты директорының орынбасары Данияр Жансейітов Қазақстан үшін атом энергетикасының артықшылықтары туралы айтып берді, деп хабарлайды aqshamnews.kz
Данияр Жансейітов атом электр станциясын (АЭС) салудың мақсатын түсіндіріп, бұл ел үшін маңызды шешім екенін және ол 24 сағат бойы тұрақты энергиямен қамтамасыз ететінін атап өтті. Оның пікірінше, басқа жаңартылатын энергия көздері тұрақты түрде қажетті көлемде энергия өндіре алмайды. Алдағы 10 жылда атом энергетикасы қолжетімді энергия көздерінің 9%-ын құрайтын болады, бұл Қазақстанға экологиялық таза, тұрақты энергия береді.
Экономикалық және әлеуметтік тұрғыда АЭС үлкен әсер етеді. Жансейітовтың айтуынша, АЭС құрылысы кезінде 8-10 мың жұмыс орны ашылып, кейін 2 мың адам станцияда тұрақты жұмыс істейді. Бұл тек экономиканы ғана емес, ғылымды да дамытуға ықпал етеді. Түркиядағы Мерсин провинциясында АЭС құрылысы барысында тұрғындар саны 1000-нан 35 000-ға дейін өскенін мысалға келтірді. Улкен ауылында да осындай әлеуметтік өзгерістер болуы мүмкін.
Д.Жансейітов III+ буындағы реакторлардың қауіпсіздігін ерекше атап өтті. Олардың қауіпсіздік шаралары қатаң және ядролық апаттардан, соның ішінде Чернобыль мен Фукусима сияқты жағдайлардан әлдеқайда қорғалған. Атом бомбаларына қарағанда АЭС-тің отыны мүлдем басқа сипатта және қоршаған ортаға айтарлықтай қауіп төндірмейді.
Д.Жансейітов Балқаш көліне әсер ету мәселесін де қозғап, АЭС көлдің су көлеміне елеулі әсер етпейтінін түсіндірді. АЭС бір жылда тек 65 млн текше метр су қолданса, Балқаш көлінің жалпы көлемі 110 млрд текше метрді құрайды.
Қазақстанда атом энергетикасы саласында білікті мамандар бар екенін атап өтті. Ол Қазақстандағы ғылыми-зерттеу институттарында үш реактор жұмыс істеп тұрғанын, олардың біреуі 57 жыл бойы ақаусыз жұмыс істеп келе жатқанын айтты. Жансейітовтың айтуынша, МАГАТЭ стандарттарына сай келетін 400-ге жуық маман қазірдің өзінде жұмыс істеп жатыр.
Сөз соңында Данияр Жансейітов Қазақстанда ядролық физика, атом энергетикасы және атом энергетикасына арналған жаңа материалдар бойынша мамандар даярланатынын атап өтті.
2011 жылдан бері 600-ден астам маман даярланып, олардың көбі қазіргі уақытта өз саласында қызмет етуде.