2024 جىلعى 16 ماۋسىمدا ايەلدەردىڭ قۇقىقتارىن قورعاۋعا جانە بالالاردىڭ قاۋىپسىزدىگىن قامتاماسىز ەتۋگە باعىتتالعان زاڭ كۇشىنە ەندى.
بۇل زاڭ بالالاردىڭ قاۋىپسىزدىگىن قامتاماسىز ەتۋگە باعىتتالعان ناقتى شارالاردى ەنگىزۋگە جول اشتى. ناتيجەسىندە زورلىق-زومبىلىق پەن قاتىگەزدىككە قارسى ارەكەت ەتۋ جۇيەلى سيپات الدى جانە العاشقى وڭ ناتيجەلەر بايقالا باستادى، دەپ حابارلايدى aqshamnews.kz.
2025 جىلدىڭ العاشقى بەس ايىندا بالالارعا قاتىستى جىنىستىق قول سۇعىلماۋشىلىقتى بۇزۋ قىلمىستارىنىڭ سانى 2024 جىلدىڭ وسى كەزەڭىمەن سالىستىرعاندا 21،3%-عا ازايدى. اۋىر قىلمىستار – 8%-عا، اسا اۋىر قىلمىستار – 19%-عا قىسقاردى.
الدىن الا ەسكەرتۋسىز تەكسەرۋلەر جۇرگىزۋ تۋرالى نورمانىڭ ماڭىزى اسا زور بولدى. ءبىر جىل ىشىندە بالالاردىڭ قۇقىقتارىن قورعاۋ كوميتەتى 58 تەكسەرۋ جۇرگىزىپ، 1500-دەن استام بالانىڭ قۇقىعى قالپىنا كەلتىرىلدى. 24 ۇيىم باسشىسى اكىمشىلىك، 78 مامان تارتىپتىك جاۋاپكەرشىلىككە تارتىلدى.
ەلىمىزدىڭ بارلىق وڭىرىندە پسيحولوگيالىق قولداۋ ورتالىقتارى اشىلدى. 2025 جىلدىڭ باسىنان باستاپ بۇل ورتالىقتار 50 مىڭنان استام ازاماتقا، سونىڭ ىشىندە زورلىق-زومبىلىقتان زارداپ شەككەن بالالار مەن اتا-انالارعا كومەك كورسەتتى.
«بۇل زاڭ جەكەلەگەن ارەكەتتەردەن جۇيەلى تاسىلگە كوشۋگە مۇمكىندىك بەردى. بۇگىندە ەلىمىزدە بالالاردى قورعاۋدىڭ تۇراقتى مودەلى قالىپتاستى، وندا مەكتەپتەن باستاپ ۋاكىلەتتى وكىلگە دەيىنگى ءاربىر بۋىن الدىن الۋ مەن كومەك كورسەتۋ ءۇشىن جۇمىس ىستەيدى»، – دەپ اتاپ ءوتتى ق ر وقۋ-اعارتۋ مينيسترلىگىنىڭ بالالاردىڭ قۇقىقتارىن قورعاۋ كوميتەتىنىڭ ءتورايىمى ناسىمجان وسپانوۆا.
بالانى قورعاۋ جۇيەسىنىڭ ماڭىزدى ەلەمەنتىنە وڭىرلىك ۋاكىلدەر ينستيتۋتى اينالدى. ولار تاۋەلسىز مارتەبەگە جانە بالالار بار بارلىق مەكەمەلەرگە، سونىڭ ىشىندە جابىق ۇيىمدارعا دا كەدەرگىسىز كىرۋ قۇقىعىنا يە. ورىن العان زورلىق-زومبىلىقتىڭ ءاربىر فاكتىسى ۋاكىلدەردىڭ تىكەلەي باقىلاۋىندا.
«111» بايلانىس ورتالىعى وتباسى، ايەلدەر جانە بالالاردى قورعاۋ ماسەلەلەرى بويىنشا ءبىرىڭعاي جۇگىنۋ ارناسى رەتىندە زاڭمەن بەكىتىلدى. 2025 جىلدىڭ باسىنان باستاپ 88 مىڭنان استام ءوتىنىش كەلىپ ءتۇستى. مەكتەپتەردە QR-كود ارقىلى قۇپيا تۇردە حابارلاما بەرۋ جۇيەسى ەنگىزىلدى. سونىمەن قاتار، «دوسبولLiKe» انتيبۋللينگتىك باعدارلاماسى جۇزەگە اسىرىلۋدا، مەكتەپتەگى جابىرلەۋ ءۇشىن اكىمشىلىك جاۋاپكەرشىلىك كۇشەيتىلدى. ۆەدومستۆوارالىق جەدەل ارەكەت ەتۋ الگوريتمدەرى جۇمىس ىستەيدى.
مەملەكەت باسشىسى ۇلتتىق قۇرىلتايدىڭ IV وتىرىسىندا بەرگەن تاپسىرماعا سايكەس، بالالارعا كومەك كورسەتۋ، ولاردى قورعاۋ جانە زورلىق-زومبىلىقتىڭ الدىن الۋ بويىنشا قوسىمشا شارالار «قازاقستان بالالارى» باعدارلاماسىنىڭ تۇجىرىمداماسىنا جۇيەلى تۇردە ەنگىزىلەتىن بولادى.