الماتىدا پرەزيدەنتتىڭ سيفرلاندىرۋ مەن جاساندى ينتەللەكتتى دامىتۋ جونىندەگى تاپسىرمالارى جۇزەگە اسىرىلىپ كەلەدى
الماتى قالاسىنىڭ اكىمى دارحان ساتىبالدى جۇمىس ساپارى اياسىندا شاھاردىڭ ءىرى كاسىپورىندارىنىڭ ءبىرى «Caspian Beverage Holding» اكسيونەرلىك قوعامىنىڭ جۇمىسىمەن جانە MOST IT Hub Almaty يننوۆاسيالىق الاڭىمەن تانىستى، - دەپ حابارلايدى Aqshamnews.kz.
1964 جىلى قۇرىلعان Caspian Beverage Holding زاۋىتىندا قالا باسشىسى وندىرىستىك ۇدەرىستەر مەن كاسىپورىننىڭ ەكولوگيالىق باستامالارىن كورىپ قايتتى. كومپانيا تاۋلىگىنە 500 مىڭعا دەيىن سۋسىن بوتەلكەسىن شىعارادى، 500 ادامدى جۇمىسپەن قامتىپ وتىر جانە جىل سايىن شامامەن 2 ملرد تەڭگە كولەمىندە سالىق تولەيدى.
كاسىپورىن ورنىقتى دامۋ تەحنولوگياسىن بەلسەندى تۇردە ەنگىزىپ كەلەدى. سونىڭ ءبىرى كومىرقىشقىل گازىن قايتا وڭدەۋدىڭ تۇيىق سيكلى، بۇل اۋاعا تارايتىن زياندى شىعارىندىلاردى ەداۋىر ازايتۋعا مۇمكىندىك بەرەدى.
دارحان ساتىبالدىنىڭ ايتۋىنشا، مۇنداي ەكولوگيالىق جاۋاپكەرشىلىگى جوعارى وندىرىستەر قالانىڭ ەكونوميكالىق دامۋىنا جانە تابيعاتتى ايالاۋعا نەگىزدەلگەن «جاسىل ەكونوميكانىڭ» وركەندەۋىنە ەلەۋلى ۇلەس قوسادى.
ساپار بارىسىندا اكىم MOST IT Hub Almaty – ستارتاپتار مەن تەحنولوگيالىق كاسىپكەرلىكتى دامىتۋعا ارنالعان زاماناۋي يننوۆاسيالىق ورتالىققا باردى. حابتا 80-نەن استام IT-كومپانيا شوعىرلانعان، ولار يننوۆاسيالىق جانە عىلىمي جوبالاردى جۇزەگە اسىرىپ كەلەدى. مۇندا اكسەلەراسيالىق جانە ءبىلىم بەرۋ باعدارلامالارى، ۆەنچۋرلىق باستامالار مەن جاساندى ينتەللەكت زەرتحانالارى جۇمىس ىستەيدى.
كەزدەسۋ بارىسىندا قالا باسشىسى IT-سالانى جانە جاساندى ينتەللەكت تەحنولوگيالارىن دامىتۋ – پرەزيدەنت قاسىم-جومارت توقايەۆ ايقىنداعان نەگىزگى باسىمدىقتاردىڭ ءبىرى ەكەنىن اتادى.
«مەملەكەت باسشىسىنىڭ سيفرلاندىرۋ مەن جاساندى ينتەللەكتتى دامىتۋ جونىندەگى تاپسىرمالارى اياسىندا ەڭ باستىسى، ستارتاپتاردى عانا ەمەس، ءومىر ساپاسىن جاقسارتاتىن، الماتىنى اقىلدى، ىڭعايلى ءارى ءقاۋىپسىز قالاعا اينالدىراتىن ناقتى شەشىمدەردى ەنگىزۋ. ءبىز قالا مەن تۇرعىندارعا پايدا اكەلەتىن IT-جوبالاردى قولداۋعا دايىنبىز»، – دەدى دارحان ساتىبالدى.
اكىمنىڭ ايتۋىنشا، ونەركاسىپ پەن IT-سەكتور الماتىنىڭ تۇراقتى دامۋىنىڭ نەگىزگى قوزعاۋشى كۇشى. ولار جاڭا جۇمىس ورىندارىن قۇرىپ، ينۆەستيسيا تارتىپ، مەگاپوليستىڭ تەحنولوگيالىق الەۋەتىن ارتتىرۋعا جول اشادى.