Indýstrıa jáne ınfraqurylymdyq damý mınıstri Qaıyrbek Óskenbaev «Eýropalyq odaq – Ortalyq Azıa: «Jahandyq dáliz» Strategıasy» ózara yntymaqtastyqty arttyrýǵa arnalǵan Samarqand konferensıasyna qatysty, dep habarlaıdy Almaty-akshamy.kz.
Vedomstvo basshysy «Jańa geosaıası jaǵdaıdaǵy Qazaqstannyń kólik júıesi» taqyrybyna arnalǵan paralel sesıasynda kópshilik aldynda elimizdiń atalǵan baǵytta ustanǵan saıasatyn jetkizip, onda osy aımaq pen Eýropa elderi arasyndaǵy tranzıttik aǵyndardy qamtamasyz etetin Orta jáne Ońtústik dálizderdi damytýǵa baılanysty qolǵa alynǵan jumystardy aıtyp berdi.
Sondaı-aq konferensıaǵa qatysýshylar Qazaqstannyń júk tasymalyndaǵy kórsetkishteri jáne mınıstrlik josparlaǵan 2025 jylǵa deıingi jobalar týraly málimetke qanyqty. Onyń ishinde Aqtaý portynda konteınerlik hab qurý, Dostyq-Moıynty ýchaskesinde ekinshi temirjol men Almaty stansasynda aınalma temirjol jelisin salý, saýda flotyn keńeıtý, sondaı-aq júk tranzıtiniń kólemin jylyna 10 mln tonnaǵa deıin ulǵaıtý boıynsha perspektıvalarymen tanysty.
Sońynda mınıstr júkterdi tasymaldaýda «ótpeli» tarıftik mólsherlemeni qarastyratyn «Jasyl dálizdi» quryp, júk tasymaly qujat aınalymynda «jiksiz» almasýdy jolǵa qoıýdy, sonymen birge halyqaralyq naryqtarǵa shyǵýǵa múmkindik beretin «Sıfrly kólik dálizin qalyptastyrýdy usyndy.
Indýstrıa jáne ınfraqurylymdyq damý mınıstriniń aıtýynsha, atalǵan usynystar Eýropalyq odaq pen Ortalyq Azıa elderi arasyndaǵy alys-beristi turaqty jáne qaýipsiz iske asyrýǵa jol ashady.