Qazaqstan Prezıdenti Qasym-Jomart Toqaev telekópir rejıminde Qaraǵandy oblysynyń Jáırem kentinde jańadan ashylǵan ken baıytý kesheniniń jumysyn resmı túrde iske qosty, dep habarlaıdy almaty-akshamy.kz
Ken baıytý fabrıkasynyń qurylysynda 2500-ge jýyq adam jumys istedi. Jáırem kenti úshin jańa jobanyń iske qosylýy jańa ómir men damýdyń zor keleshegine jol ashady. Ken baıytý kesheni Qazaqstanda myrysh pen qorǵasyn konsentrattaryn shyǵaratyn eń iri kásiporyn bolady. Óndiriste 400 adam jumyspen qamtylady.
Qaraǵandy oblysynyń ákimi Jeńis Qasymbek Memleket basshysyna aımaq úshin atalǵan jobanyń mańyzy zor ekenin aıtty. Jańa fabrıka shyǵarylatyn ónim túrleri kóbeıedi jáne óndiris kólemi 2,5 ese artyp, 5 mıllıon tonnaǵa deıin jetedi. Sondaı-aq óńdelgen ónimniń eksporty ulǵaıyp, salyq túsimi 1,5 mıllıard teńgege kóbeıedi. Joba bastalǵaly beri ınvestorǵa barynsha qoldaý kórsetildi. Júıeli júrgizilgen jumystyń nátıjesinde koronavırýs indetine qaramastan, joba belgilengen merzim ishinde aıaqtaldy.
Prezıdentke qazirgi tańda Qaraǵandy oblysynda 2 trıllıon teńgeden asatyn qarajatqa 50 iri ınvestısıalyq joba iske asyrylyp otyrǵany jóninde baıandaldy. Bıyl 14 joba iske qosylyp, aımaqtyń ónerkásip kásiporyndarynyń ınfraqurylymyna tartylatyn ınvestısıa kólemi 230 mıllıard teńgeni quraıdy.
«Qazmyrysh» JSHS bas dırektory Aleksandr Hmelev Qasym-Jomart Toqaevqa fabrıkanyń qurylysy 3 jylda aıaqtalǵanyn jáne koronavırýs indeti júktelgen mindetti iske asyrýǵa kedergi bolmaǵanyn aıtty. Onyń pikirinshe, baıytý fabrıkasynyń iske qosylýy Jáıremdi ǵana emes, tutastaı Qaraǵandy oblysyn damytýdyń jańa kezeńi bolmaq. Munda jylyna 5 mıllıon tonna ken óńdeledi. Bul kásiporynnyń keminde 15 jyl jumys isteýine múmkindik beredi.
Sonymen qatar «Qazmyrysh» kompanıasy kenttiń damýyna 5 mıllıard teńgege jýyq qarajat quıdy. Jergilikti aýrýhanaǵa zamanaýı jabdyqtar satyp alynyp, quzyretterdi damytý ortalyǵy quryldy jáne komýnaldyq salany jańǵyrtý men damytýǵa jyl saıyn qarjy bólinedi.
Jáıremdegi ken baıytý kesheniniń seh basshysy Erkin Shaıhın Memleket basshysyna qoldaý kórsetkeni úshin alǵys bildirip, kenttiń jandanǵanyn jáne ondaǵy oń ózgerister týraly, sondaı-aq jańa fabrıkanyń iske qosylýynan jergilikti turǵyndar zor úmit kútetinin aıtty.
İs-shara sońynda Prezıdent kásiporynnyń eńbek ujymyna jáne osy iri jobany iske asyrýǵa atsalysqan barsha azamattarǵa rızashylyǵyn bildirip, tabys tiledi.