Parlament Májilisiniń depýtaty, "AMANAT" partıasy fraksıasynyń múshesi Temir Qyryqpaev Qarjy naryǵyn retteý jáne damytý agenttiginiń tóraıymy Mádına Ábilqasymovaǵa óndirip alýdan qorǵalatyn áleýmettik shot engizý bastamasy men shoty buǵattalǵan azamattarǵa arnalǵan tásilder týraly surady, - dep habarlaıdy aqshamnews.kz tilshisi.
"Keıingi málimetterge sáıkes, elimizde shamamen 38 mıllıonnan asa shot buǵattalyp tur. Men azamattardyń eń tómengi tabysyn qorǵaý jáne óndirip alýshylar men boryshkerler quqyqtarynyń teńgerimdi saqtalýyn qamtamasyz etý maqsatynda zań jobasyna qorǵalǵan áleýmettik shot nemese arnaıy banktik shot ashý týraly usynys berdim", – deıdi depýtat.
Ol mundaı shotqa aıyna 300 myń teńgege deıingi somadaǵy túsimderge óndirip alý sharalary qoldanylmaıtynyn aıtyp ótti.
"Siz azamattarǵa aıyna 300 myń teńgege deıingi somada óndirip alýdan qorǵalatyn áleýmettik shot engizý bastamasyna qalaı qaraısyz jáne shoty buǵattalǵan azamattar úshin sizdiń agenttik qandaı tásilder qarastyryp jatyr?" – dep depýtat Mádına Ábilqasymovaǵa saýalyn joldady.