2025 жылғы 14–16 мамыр күндері Қазақстанның Түркістан қаласында « Заман мен мәдениеттер диалогында Ясауи мұрасы: гуманистік бағыт-бағдар мен заманауи сын-қатерлер» тақырыбында Халықаралық симпозиум өтті. Аталған шараға Түркі мәдениеті және мұрасы қорының президенті Ақтоты Райымқұлова қатысты.
Симпозиумның ашылуында сөз сөйлеген Ақтоты Райымқұлова Түркістанның Түркі әлемінің рухани астанасы ретіндегі маңызына ерекше тоқталып, ұлы ойшыл Қожа Ахмет Ясауидің ілімі қазіргі заманда да адамзат үшін маңызды моральдық бағдар болып қала беретінін атап өтті. Ол Түркі мәдениеті және мұрасы қоры жүзеге асырып жатқан негізгі бастамалармен таныстырды. Олардың қатарында – тарихи ескерткіштерді қалпына келтіру жобалары, TurkicHeritage халықаралық цифрлық платформасы мен көптілді каталогты әзірлеу, Түркі мемлекеттері мен шетелдердегі жетекші университеттер жанынан Түркі мәдениеті орталықтарын ашу, сондай-ақ түркі эпостары мен дәстүрлі қолөнер үлгілерін ЮНЕСКО тізіміне ұсыну сияқты бастамалар бар.
Өз сөзінде Қор басшысы Қожа Ахмет Ясауидің «Диуани хикмет» шығармасын әзербайжан тіліне аудару жұмысына да арнайы тоқталып өтті. Бұл бастама – Ясауи мұрасын түркі халықтары арасында кеңінен таратуға бағытталған маңызды қадам ретінде бағаланды.
Симпозиум Ясауи мұрасын гуманистік көзқарас тұрғысынан зерделеу арқылы заманауи сын-қатерлерді талқылауға арналған маңызды ғылыми-рухани алаңға айналды.
Айта кетейік, симпозиумның ашылу салтанатында құттықтау сөз сөйлегендер қатарында Қазақстан Республикасының Мемлекеттік кеңесшісі Ерлан Қарин, ҚР Мәдениет және ақпарат министрі Аида Балаева, Түркістан облысының әкімі Нұралхан Көшеров, ҚР Ғылым және жоғары білім министрі (пленарлық отырыстың модераторы) Саясат Нұрбек, Индиана университетінің профессоры (АҚШ) Девин Де Уис және Анкара университетінің профессоры (Түркия) Али Рафет Озкан болды.
Пленарлық отырыс пен секциялық сессиялар аясында Әзербайжан, Қазақстан, Қырғызстан, Түркия, Өзбекстан, Түрікменстан, Тәжікстан, Иран, Жапония, Германия, Үндістан, Ресей, Италия, Қытай және АҚШ-тың жетекші зерттеушілері мен сарапшылары ғылыми баяндамалар жасап, тәжірибе алмасты.