الماتى وبلىسىندا قازۇۋ ارحەولوگتارى ساق ءداۋىرىنىڭ التىن جۇزىگىن تاپتى، دەپ حابارلايدى aqshamnews.kz باسپا ءسوز قىزمەتىنە سىلتەمە جاساپ.
ءال-فارابي اتىنداعى قازۇۋ-دىڭ تاريح فاكۋلتەتىنىڭ دەكانى، پروفەسسور دوسبول بايعوناقوۆتىڭ جەتەكشىلىگىمەن الماتى وبلىسىنىڭ ۇيعىر اۋدانىندا قازبا جۇمىستارى جۇرگىزىلگەن.
ءال-فارابي اتىنداعى قازۇۋ-دىڭ باسپا ءسوز قىزمەتىنىڭ حابارلاۋىنشا، توعىزبۇلاق اۋىلىنىڭ ماڭىندا ەرتە تەمىر داۋىرىنە جاتاتىن قورعاندار زەرتتەلدى. ماماندار اۋىلدىڭ وڭتۇستىك بولىگىندە ورنالاسقان جانە 20-دان استام قورعاننان تۇراتىن توعىزبۇلاق-1 جانە توعىزبۇلاق-2 قورىمدارىندا دالالىق زەرتتەۋلەر جۇرگىزدى. ارحەولوگيالىق نىسانداردىڭ نەگىزگى بولىگى تىزبەكتەلە ورنالاسقان جانە سولتۇستىكتەن وڭتۇستىككە باعىتتالعان ەليتالىق قورعاندارعا جاتادى. توعىزبۇلاق-2 قورىمى اۋىلدىڭ سولتۇستىگىندە ورنالاسقان جانە جالپى سانى 30-دان اساتىن ءتۇرلى قورعانداردان تۇرادى.
"توعىزبۇلاق-1 قورىمىنداعى دالالىق زەرتتەۋلەر بارىسىندا ءتورت قورعان، ال توعىزبۇلاق-2 قورىمىندا ەكى ارحەولوگيالىق نىسان قازىلدى. توعىزبۇلاق-1 قورىمىنداعى №3 جانە №4 قورعانداردىڭ ۇيىندىسىنەن التىن اشەكەيلەردىڭ تابىلۋى ايتۋلى جاڭالىق بولدى. №4 قورعاننان ەر مەن ايەلدىڭ سۇيەكتەرى تابىلدى. سۇيەك قالدىقتارىنىڭ جانىنان كەراميكالىق ىدىستار، تەمىر زاتتار، تاس كەلساپ، جانۋارلار سۇيەكتەرى، التىن تىزبەكتىڭ سىنىعى، ءارتۇرلى التىن پلاستينالار جانە ت.ب. تابىلدى"، دەدى تاريح عىلىمىنىڭ دوكتورى، پروفەسسور دوسبول بايعوناقوۆ.
№3 قورعاننىڭ ۇيىندىسىنەن ادامنىڭ سۇيەك قالدىقتارى، سونداي-اق التىن پلاستينالار تابىلدى. ولاردىڭ اراسىندا ارىستاننىڭ سۋرەتى سالىنعان التىن جۇزىك ەرەكشەلەنەدى. مۇنداي ارتەفاكتىلەر سيرەك كەزدەسەدى. سالماعى 8 گرامعا جۋىق جۇزىك التىن قۇيماسىنان جاسالعان. جۇزىكتەگى ارىستاننىڭ بەينەسى سينكرەتيزممەن تىعىز بايلانىستى. ءبىر قاراعاندا ايەلدىڭ ءجۇزىن، ارىستاننىڭ تۇمسىعى مەن جالىن، ءتىپتى بۇقانى، قوشقاردى كورۋگە بولادى، ولاردىڭ تاڭباسى ەجەلگى تايپالاردا كەڭ تاراعان. مامانداردىڭ ايتۋىنشا، مۇنداي جەرلەۋ ورىندارى مەن ارتەفاكتىلەر قازاقستان اۋماعىندا مەكەندەگەن ساق تايپالارىنا ءتان. تابىلعان قازبالار شامامەن ب.ز.د. IV-III عاسىرلارعا جاتادى.
"توعىزبۇلاق-1 جانە توعىزبۇلاق-2 قورىمدارىنان تابىلعان زاتتار ەرتە تەمىر داۋىرىمەن مەرزىمدەلەدى جانە قازىرگى ۇيعىر اۋدانىنىڭ اۋماعى ساق مادەنيەتى ورتالىقتارىنىڭ ءبىرى بولعانىن دالەلدەيدى"، دەلىنگەن ۋنيۆەرسيتەت حابارلاماسىندا.