Оқу-жаттығуды үйлестіру жөніндегі республикалық штаб Шығыс Қазақстан облысының Өскемен қаласында орналасқан.
Оқу-жаттығудың екінші күні жойқын жер сілкінісінің салдарын жою кезінде авариялық-құтқару құралымдарының практикалық іс-қимылдарын пысықтау жалғастырылды, деп хабарлайды Almaty-akshamy.kz Төтенше жағдайлар министрлігіне сілтеме жасап.
Осындай іс-шаралар еліміздің барлық сейсмикалық қауіпті өңірлерінде Алматы, Шымкент қалаларында, Абай, Жетісу, Алматы, Шығыс Қазақстан, Жамбыл, Қызылорда және Түркістан облыстарында өткізілді. Қалған өңірлерде апат аймақтарына күштер мен құралдарды жіберу ұйымдастырылды.
Оқу-жаттығу еліміздің сейсмикалық қауіпті өңірлерінде тұратын халықты жер сілкінісі мен басқа да төтенше жағдайлар туындаған кездегі іс-қимылдарға жаппай үгіт-насихат жүргізуге және оқытуға бағытталған бірыңғай кешенді міндет форматында өтті.
Халықты жер сілкінісі кезіндегі іс-қимылдарға оқыту мақсатында «жер сілкінісі кезіндегі 10 қадам» және «дабыл чемоданын жасақтау» жадынамаларын тарата отырып, жалпы саны 300 мың адамды қамтитын 5 мыңға жуық көпқабатты тұрғын үй мен 23 мың жеке тұрғын үйді аралау жүргізілді. Зардап шеккен халықты қабылдау пункттерін орналастыру туралы ақпараты бар 24 мыңнан астам дана QR кодтары орнатылды.
Оқу-жаттығу барысында мемлекеттік органдар арасындағы өзара іс-қимылды ұйымдастыру, халықты хабардар ету, эвакуациялау, зардап шеккен халықты орналастыру, медициналық және психологиялық көмек көрсету, оқу-жаттығу жоспарына сәйкес тұрақты орналасқан пункттерден жиынтық топтарды қалыптастыру, тасымалдау және төтенше жағдай аймағына көшіру, құтқару құралымдарының күштері мен құралдарын басқару, сондай-ақ волонтерлік және үкіметтік емес ұйымдармен жұмыс мәселелері пысықталды.
Барлық мүдделі қызметтер мен ұйымдарды тарта отырып, 203 тактикалық-арнайы оқу-жаттығу өткізілді, оған 5 мың адам және 1 мың бірлік техника, оның ішінде әуе кемелері тартылды. Зардап шеккен халыққа арналған 20 лагерь, 10 жылжымалы госпиталь, сондай-ақ 10 далалық басқару пункті ашылды.