Қазақстан үкіметі салықтан жалтаруға қарсы күресті күшейтуді көздеп отыр. Бұл туралы Ұлттық экономика министрлігінің Салық және кеден саясаты департаментінің директоры Ерлан Сағнаев мәлімдеді, деп хабарлайды Aqshamnews.kz. Оның айтуынша, әсіресе салықты бөлшектеу арқылы міндеттемелерден жалтару – ел бюджетін миллиардтаған теңгеден айырып, әлеуметтік инфрақұрылымның дамуына кедергі келтіруде.
Ерлан Сағнаев салық төлеуден жалтару әрекеттерін қоғам алдындағы жауапкершіліктен қашу деп бағалайды. Оның айтуынша, мұндай қадамдар бюджетке түсетін кірісті азайтып, оның салдарынан жаңа мектептер, ауруханалар мен жолдар салуға қажетті қаражат жетпейді.
«Көлеңкелі схемаларды қолданған кәсіпкерлер салықтан жалтарып, мемлекетті емес, өз қалталарын ғана ойлайды. Олар шын мәнінде қарапайым халықтың мүмкіндігін ұрлап отыр. Бұл – сапалы білім мен медицинадан айыру деген сөз», – деді Сағнаев.
Құрылыс саласындағы көлеңкелі экономика – басты назарда
Сағнаевтың айтуынша, құрылыс саласы – салықтан жалтару жиі тіркелетін бағыттардың бірі. Бұған дейін салаға берілген қосылған құн салығынан (ҚҚС) босату жеңілдіктеріне қарамастан, тұрғын үй бағасы 21 есеге дейін қымбаттаған.
«Салықтық жеңілдіктер жойылған жағдайда, құрылыс саласынан бюджетке кемінде 130 млрд теңге қосымша түсім түсер еді. Бұл қаржыға кемі 40 жаңа мектеп салуға болады», – деді ол.
Салық төлеу – әлеуметтік жауапкершілік
Қазақстанда салық төлеу тек заң алдындағы міндет емес, азаматтық жауапкершілік ретінде қарастырыла бастады. Бұл – дамыған елдерде қалыптасқан салық мәдениетінің негізі.
Мемлекет бизнес үшін ашық әрі заңды жұмыс істеуге барлық жағдай жасап отыр. Енді кәсіпкерлерден көлеңкелі схемалардан бас тарту талап етіледі.
«Мемлекет заңды бизнес жүргізуге мүмкіндік береді. Бірақ ресурстарды әділ бөлу мен тұрақты экономикалық өсім үшін көлеңкелі экономикадан толық бас тарту қажет», – дейді Сағнаев.
Бақылау күшейтіледі
Алдағы уақытта салықтан жалтару фактілерін анықтау мен алдын алу шаралары күшейтіледі. Бұл әділ бәсекелестік орнатып, бюджетті әлеуметтік салаға тиімді бағыттауға мүмкіндік береді.
Салықтан жалтару – елдің әлеуметтік дамуына тікелей кедергі. Бюджетке түспеген әрбір теңге – салынбаған мектеп, құрал-жабдықсыз аурухана немесе жөнделмеген жол. Сондықтан ашық экономика құру мен салық мәдениетін қалыптастыру – мемлекет қана емес, әрбір азамат пен кәсіпкер үшін ортақ міндет.