Алматыда полиция қызметкерлері қоғамдық тәртіптің сақталуын қамтамасыз ету және тұрғындардың қауіпсіздігін күшейту мақсатында қаладағы ойын-сауық орындарында кешенді тексерулер жүргізді, - деп хабарлайды Aqshamnews.kz.
Рейд барысында кальян қолдануға қатысты 40-тан астам құқық бұзушылық анықталып, 50-ден астам кальян аппараты тәркіленді. Сонымен қатар тиісті рұқсатсыз еңбек қызметін атқарған шетелдік азаматтар және кәмелетке толмағандардың ойын-сауық нысандарына заңсыз кіру деректері анықталды. Барлық материалдар Қазақстан Республикасының заңнамасына сәйкес одан әрі қарау және шара қабылдау үшін жолданды.
– 2025 жыл – Профилактика жылы деп жарияланды және біздің негізгі міндетіміз – құқық бұзушылықтардың алдын алу, қоғамдық тәртіпті нығайту және "Заң және тәртіп" қағидатын сақтау. Ерекше жауапкершілік ойын-сауық орындарының иелері мен әкімшілігіне жүктеледі, олар құқық бұзушылыққа жол бермейтін жағдай жасап, келушілердің қауіпсіздігін қамтамасыз етіп, заң талаптарын қатаң орындауы тиіс. Полиция қызметкерлері жүйелі тексерулерді жалғастырып, анықталған құқық бұзушылықтарға қатаң шара қолданатын болады. Бұл әрбір азаматтың өзін қауіпсіз сезінуі үшін қажет, – деп атап өтті Алматы қаласы полиция департаментінің қоғамдық қауіпсіздік басқармасының бастығы Асхат Құлбаев.
