Алматы қаласы Мәдениет басқармасына қарасты Қазақ мемлекеттік циркінің жас талантты өнерпазы, цирк әулетінің жалғастырушысы, Ж.Елебеков атындағы РЭЦК студенті, 16 жастағы Әли Салаватов Ресейдің Тула қаласында өткен «На языке мира» V Халықаралық балалар мен жастар цирк өнері фестивалінде қола жүлде алды.
Аталған фестиваль әлемнің түкпір-түкпірінен жиналған жас артистердің шеберлігін көрсететін маңызды халықаралық алаң. Іс-шараға жонглерлер, акробаттар, сайқымазақтар, эквилибристер және цирк өнерінің басқа да бағыттары бойынша көптеген елден дарынды қатысушылар жиналды. Биылғы фестиваль манежде 200-ден астам жас өнерпазды біріктірді.
Әлидің «Еденге соқпалы доптармен жонглёрлік өнер» атты көркем нөмірі қазылар алқасы мен көрермендерді ерекше шеберлігімен, орындау дәлдігімен және жарқын энергиясымен баурап алды. Фестивальдегі жоғары бәсекелестік деңгейі бұл жетістіктің құндылығын одан әрі арттырып, жас артистің талантын айқын көрсетті.
«Мен үшін бұл жеңіс – жаңа мүмкіндіктерге жол ашқан ерекше сәт. Қолдаған ұстаздарыма, ұйымдастырушыларға және жанкүйерлерге шын жүректен алғыс айтамын. Алдағы уақытта бұдан да биік асуларды бағындыруға ұмтыламын», - деді жас артист.
