Танымал қазақ жазушысы Бердібек Соқпақбаевтың 100 жылдығы Түркі дүниесі мәдениет орталығында салтанатты түрде атап өтілді, деп хабарлайды aqshamnews.kz.
Шара аясында жазушының түрік тіліне аударылған «Өлгендер қайтып келмейді» кітабының тұсауы кесілді. Аударған түрік ғалымы Хусеин Варол.
Шарада ТҮРКСОЙ ұйымының бас хатшысы Сұлтан Раевтың сәлемін Қазақстанның өкілі Бақытжан Омар жеткізді. Стамбұлға Алматы облысының мәдениет басқармасының басшысы Данияр Алиев бастаған делегация арнайы келген. Олардың арасында жазушының қызы Самал Соқпақбаева да бар.
Түрік және башқұрт ғалымдары Бердібек Соқпақбаевтың шығармасымен жақыннан танысып, алған әсерлерімен бөлісті. Жазушының мерейтойы 6 қараша күні ЮНЕСКО-ның бас штаб-пәтерінде атап өтіледі.
Бұл шара жазушының шығармашылығын насихаттауға және мәдени байланыстарды нығайтуға бағытталған маңызды шара болып табылады.
Қаламгердің «Менің атым Қожа», «Балалық шаққа саяхат», «16 жасар чемпион» сынды шығармалары да оқырманға етене таныс. Жазушының еңбектері бүгінге дейін әлемнің 68 тіліне аударылған. Ал түрік жазушысы аудармаға 2 жыл уақытын жұмсапты.