Осы аптада ҰҚК Шекара қызметі Алматы облысы бойынша департаментіне қарасты Қарасай ауданының шекара басқармасына қарасты Ақжардағы техникалық және кәсіби даярлық бөлімінде сарбаздарға арналған көрсетілім сабағы өтті.
Жылдағы дәстүр бойынша «Күз-2024» шақырылымының сарбаздарына Шекара қызметінің қолданысындағы техникалар, қару-жарақтар, байланыс құралдары және азық-түлік көрмесі ұсынылды. Бұл шараны шебер ұйымдастырған «Қаскелең» шекара бөлімшесінің тәрбие және идеологиялық жұмыстар жөніндегі орынбасары, аға лейтенант А.Тұраров бастаған шекарашылар болды. Сонымен қатар, арнайы мақсаттағы ұтқыр іс-қимылдар тобының жауынгерлері құқық бұзушыларды ұстап, олардың алысқа кетуіне мүмкіндік бермейтін шеберліктерін көрсетті.
Шекара басқармасы бастығының орынбасары, техникалық және кәсіби даярлық бөлімінің бастығы подполковник Сағадат Әуезов бұл шараның жас сарбаздар үшін маңызын атап өтті. Осыдан кейін 500-ден астам сарбазға арналған көрсетілім сабағы басталып, болашақ шекарашылар бес топқа бөлініп, бес нүктеге барды.
Бірінші нүкте – техникалар. Мұнда шекаралық қызметте қолданылатын «Камаз», жол талғамайтын «УАЗ», арнайы мақсаттағы жауынгерлік тапсырмаларға арналған брондалған көліктер таныстырылды. Сарбаздар осы техникаларды көріп, олардың шекара қызметіндегі рөлін жақсы түсінді.
Екінші нүкте – азық-түлік көрмесі. Мұнда сарбаздар әртүрлі көкөніс пен азық-түліктің қойылған көрмесін көріп, қажетті мәліметтермен танысты.
Үшінші нүкте – қару-жарақтар көрмесі. Автоматтар, тапаншалар және снайпер винтовкалары секілді шекараны күзетуге арналған қаруларды шебер нұсқаушылар таныстырды, әрі жас сарбаздарға шеберлік сабақтарын да көрсетті.
Төртінші нүкте – байланыс құралдары. Шекара қызметінде байланыс құралдарының маңызы ерекше. Сарбаздар заманауи байланыс құралдарының жұмысын үйреніп, олардың пайдалану ережелерін түсінді. Тіпті, сарбаздардың бірі рация арқылы өзінің ауылына хабарласып, қалғандарын күлкіге бөледі.
Бесінші нүкте – арнайы мақсаттағы шекарашылар тобының көрсетілімі. Арнайы жасақтың күрделі тапсырмаларды орындау барысындағы қимылдары сарбаздарға ерекше әсер етті.
Бұл шара жас сарбаздарды алдағы ант қабылдау рәсіміне дайындап, шекара қызметіндегі өмірге бейімдеуге үлкен үлес қосты. «Күз-2024» шақырылымының сарбаздары алдағы күндері тер төгіп, шекарашылық қызметке толыққанды дайындық жасайды.