Концертте ұлттық аспаптық орындаушылық өнер мен әлемдік классикалық музыка өзара үндестік тапты, деп хабарлайды aqshamnews.kz тілшісі.
Алматыда Құрманғазы атындағы Қазақ ұлттық халық аспаптар оркестрі мен Қазақстанның халық артисі, көрнекті пианист Жания Аубакированың шығармашылық ынтымақтастығы аясында «QURMANGAZY & PIANO» концерті өтті.
Концертте ұлттық аспаптық орындаушылық өнер мен әлемдік классикалық музыка өзара үндестік тауып, оркестр мен фортепианоның көркемдік мүмкіндіктері тоғысты.
Концерт композитор Еркеғали Рахмадиевтің «Құдаша-думан» симфониялық күйімен ашылды. Бағдарламада биыл туғанына 100 жыл толып отырған композитор Мәкәлім Қойшыбаевтың «Ре мажор» симфониясы, Илья Жақановтың «Даниярдың әні», Жаяу Мұса Байжанұлының «Ақ сиса» шығармалары мен Сегіз серінің «Гауһартас» әні орындалды. Жания Аубакирова Эдвард Григтің фортепиано мен оркестрге арналған «Ля минор» концертін және Нағым Меңдіғалиевтің «Домбыра туралы аңыз» шығармасын орындады.Сонымен қатар оркестр Эдвард Григтің «Пер Гюнт» сюитасынан «Таң» және «Анитра биі» туындыларын ұсынды. Оркестрге ұлттық оркестрдің бас дирижері, «Құрмет» орденінің иегері Абылай Тілепберген дирижерлық етті.
Құрманғазы атындағы Қазақ ұлттық халық аспаптар оркестрінің «QURMANGAZY & PIANO» концерті ұлттық оркестр мен пиянист Жания Аубакирова арасындағы шығармашылық байланыстың жарқын көрінісіне айналды. Концерт ұлттық аспаптық орындаушылық өнерінің жоғары көркемдік мүмкіндіктерін танытып, қазақтың дәстүрлі музыкалық мұрасы мен әлемдік классикалық өнердің өзара сабақтастығын көрсетті. Музыкалық жоба ұлттық өнерді халықаралық мәдени кеңістікте дәріптеуге бағытталған маңызды шығармашылық бастама болды.
