Ұлттық ұланның 3650 әскери бөлімінде «Мәңгілік тағзым» атты Ауған соғысы ардагерлерімен тағылымды кездесу кеші ұйымдастырылды. Іс-шараның басты мақсаты – жас ұрпаққа отансүйгіштік рухты сіңіру, жауынгерлік дәстүр сабақтастығын нығайту және әскери борышын абыроймен атқарған ардагерлердің ерлік жолын насихаттау болды.
Кездесу барысында ауған жерінде әскери борышын өтеген ардагерлер отставкадағы полковник Балтабеков Скендир Окшиевич және отставкадағы полковник Фалеев Геннадий Дмитриевич бастан кешкен оқиғаларын, өз көздерімен көрген тарихи сәттерді баяндап, сол кезеңдегі жауынгерлік өмір, достық пен жауапкершілік, Отан алдындағы адал қызметтің маңызы туралы әңгімеледі. Шара барысында әскери қызметшілер мен кездесуге келген жалпы білім беретін № 106 орта мектептің оқушылары тарапынан түрлі сұрақтар қойылып, мазмұнды пікір алмасу өтті.
Отставкадағы полковник Скендир Балтабеков сол жылдарды еске алып:
– Ауғанстан бізге өмірдің шынайы құнын, жолдастық пен жауапкершіліктің маңызын түсіндірді. Біз үшін ең бастысы – берілген тапсырманы адал орындау және жанымыздағы жолдастарымызды аман алып қалу болды, – деп атап өтті.
Іс-шара соңында әскери қызметшілер ардагерлерге алғыс білдіріп, олардың ерлігі мен өнегелі өмір жолы жас ұрпақ үшін әрдайым үлгі екенін атап өтті. Мұндай кездесулер аға буын мен жас сарбаздар арасындағы рухани байланысты нығайтып, әскери-патриоттық тәрбиенің маңызын арттыра түсетіні сөзсіз. Кездесу соңында жеке құрам ардагерлермен бірге естелік суретке түсті.