Атырау облысында 2026 жылы 22 жаңа спорт кешенін пайдалануға беру жоспарланып отыр, деп хабарлайды Aqshamnews.kz тілшісі.
Өңірде спорт инфрақұрылымын дамыту жұмыстары қарқынды жүргізілуде. Жаңа нысандар бұқаралық және балалар-жасөспірімдер спортын дамытуға, қала мен ауыл тұрғындарына тең мүмкіндік жасауға бағытталған. Әсіресе спорт нысандары тапшы, жастары көп елді мекендерге басымдық берілген.
Құрылыс Атырау қаласының «Жұлдыз» шағынауданында және Еркінқала ауылдық округінде, сондай-ақ Индер, Құрманғазы, Исатай, Махамбет, Мақат және Қызылқоға аудандарының ауылдарында жүріп жатыр. Жаңа кешендерде бокс, еркін және грек-рим күресі, дзюдо, жеңіл атлетика, баскетбол, волейбол және байдарка мен каноэде есу секілді олимпиадалық әрі ұлттық спорт түрлерімен айналысуға жағдай жасалады.
Облыстық дене шынықтыру, спорт және туризм басқармасының мәліметінше, нысандар іске қосылғаннан кейін 3 мыңға жуық бала мен жасөспірімді тұрақты спортқа тарту көзделіп отыр. Қазір өңірде 800-ге жуық спорт нысаны жұмыс істейді.