Ашхабад қаласында Орталық Азия елдері үшін маңызды халықаралық шара – климаттың өзгеруіне арналған VII өңірлік конференция өтуде.
Іс-шараға 200-ден астам қатысушы, оның ішінде Орталық Азия мемлекеттерінің ресми делегациялары, халықаралық ұйымдар, қаржы институттары мен ғылыми-зерттеу орталықтарының өкілдері қатысып жатыр.
Конференция аясында бірнеше өзекті мәселе талқылануда. Атап айтқанда:
-
жаһандық климаттық қаржыландыруға қол жеткізу жолдары;
-
климаттық қаржыландыру тетіктерін әзірлеу;
-
өңірлік климаттық архитектураға ұлттық басымдықтарды интеграциялау;
-
төмен көміртекті даму жолына көшу бойынша ынтымақтастықты нығайту.
Қазақстан тарапынан Экология және табиғи ресурстар вице-министрі Мансұр Ошурбаев сөз сөйлеп, еліміздің 2026 жылы өтетін өңірлік климаттық саммитке ерекше мән беріп отырғанын жеткізді. Оның айтуынша, алдағы саммит – өңірлік климаттық диалогты тереңдетуге және ортақ күш-жігерді үйлестіруге арналған стратегиялық алаң болмақ.
Конференция нәтижесінде бірқатар өңірлік бастамалар мен келісімдерге негіз қаланады деп күтілуде. Бұл – Орталық Азия елдері арасындағы климаттық ынтымақтастықты жаңа деңгейге шығаратын маңызды қадам.