Белгілі саясаттанушы әрі Мәжіліс депутаты Айдос Сарым мемлекет және қоғам қайраткері Алтынбек Сәрсенбайұлының өліміне қатысты өз пікірін білдірді. «Sadaq media» арнасына берген сұхбатында ол бұл қылмысқа Нұрсұлтан Назарбаевтың қатысы бар деген тұжырымды негізсіз деп атады, деп хабарлайды aqshamnews.kz
— Бұл оқиғада Назарбаевты айыптауға дәлел жоқ. Рас, кезінде Рысбек Сәрсенбаев ағамыз эмоциямен біраз пікір айтты, әлі де айтып жүр. Бірақ әділет болуы үшін нақты айғақ керек. Назарбаевтың аты жанама түрде аталғанымен, оны нақты дәлелдеген ешкім жоқ. Мен өз басым бұл іске Рахат Әлиевтің қатысы болуы мүмкін деп есептеймін, – деді Айдос Сарым.
Депутаттың айтуынша, ол кезінде Алтынбек Сәрсенбайұлымен тығыз жұмыс істеген, көптеген құжаттарын әзірлеуге атсалысқан.
— Алтынбектің қасында жүрген Рысбек емес, мен болдым. Сондықтан бұл — менің де жеке тәжірибем мен байқағандарым, – деді ол.
Сонымен қатар, Сарым марқұм саясаткердің мінезіне де тоқталды.
— Алтынбек кезінде өте кекшіл адам болды. Көп адамды ұнатпайтын. Мәселен, Серік Әбдрахманов пен Балташ Тұрсынбаевты жақтырмайтын. Бірақ уақыт өте келе өзгерді. Өмірінің соңғы кезеңінде бұрынғы реніштерін ұмытып, көпшілікпен татуласып, сабырлы бола бастады, – дейді депутат.