Экологтар сенбілік жасайтынын хабарлады
Үлкен Алматы каналының маңы қоқыс алаңына айналып барады, деп хабарлайды Almaty-akshamy.kz Almaty.tv-ге сілтеме жасап.
Бөгде біреулер шектеуге қарамастан қала аумағындағы жазыққа тонналап қалдық пен топырақ төгуін тоқтатар емес. Медеу ауданы әкімдік өкілдерінің хабарлауынша, бүгінде мәселеге қатысты қауырт жұмыс жүргізіліп жатыр. Аумақты бақылауда ұстау үшін полиция қызметкерлері де жұмылыпты.
Өзен арнасына қарама-қарсы жатқан бұл жазыққа кіретін 3 бұрылыс бар. Әкімдік өкілдері бірінші кіреберіске қоқыс төгетіндерді бөгеу үшін жолды қазып, тыйым салған. Алайда ережені ескермегендер бұл жерді қалпына келтіріп, топырақпен жолды тегістеп қоқыс төгуін жалғастырып жатқан көрінеді.
«Топырақ төгу, құрылыс қалдықтарын төгу сынды факт анықталып жатыр. Жыл басында Экология департаменті анықтау үшін комиссия құрылды. Биыл 30 адамға айыппұл салынды. Әлі де жалғасып жатыр. Полиция қызметкерлерімен бірлесіп, күнделікті бақылап жүрміз», – деді Медеу ауданы әкімі аппараты абаттандыру бөлімінің бас маманы Марат Тілесов.
Жол жиегімен жүріп өтіп, екінші кіреберіске де келдік. Бұл жерді, міне, көргендеріңіздей әкімдік өкілдері тексеру жүргізіп 2 күн бұрын ғана жолды тастармен бөгеп тастаған. Алайда мұның қанша уақыт тұратыны, қашанға дейін жабық болатыны әзірге белгісіз.
Себебі «Қой дейтін қожасы белгісіз» жерді қанша жапса да жүк көліктері кірудің амалын табатын көрінеді. Әкімдік өкілінің айтуынша, олар қойған бөгетті алып тастаған кездері де болған. Айта кетсек, қоқыс төккендерге салынған айыппұл көлемі әзірге 2 миллион теңгеге жуықтады. Медеу әкімдігі қазір бақылау жүріп жатқанын мәлімдесе, экологтар ертең бұл маңға сенбілік жасайтынын хабарлады.
