Қазақстан Республикасының Индустрия және инфрақұрылымдық даму вице-министрі Берік Сайлауұлы Камалиев пен Польша Республикасының Инфрақұрылым және құрылыс министрі Анджей Адамчик телефон арқылы сөйлесті.
Тараптар Ресей Федерациясы мен Украина Республикасы арасындағы қазіргі төтенше жағдайдың нәтижесінде жүк тасымалы саласында туындаған жағдайды талқылады, деп хабарлайды Almaty-akshamy.kz
Вице-министр Украинаның Беларусьпен, Ресеймен және басқа елдермен шекарасында тұрып қалған 56 жүк көлігіне қатысты алаңдаушылық білдірді және кейбір көлік жүргізушілері Польша аумағына бағыт ұстайтынын айтты.
Осыған байланысты вице-министр Польша министрінен көлік құралдарының одан әрі маршрут бойынша жүру және кейін Қазақстанға оралу үшін Польша аумағы арқылы оларға кедергі келтірмей өтуіне көмек көрсетуді сұрады.
Өз кезегінде Инфрақұрылым және құрылыс министрі Анджей Адамчик автокөлік құралдарын кедергісіз өткізу мүмкіндігін қарастыруға келісті және толығырақ ақпарат жіберуді сұрады.