Апат салдарын жоюда барлығы 141 мыңнан астам адам жұмылдырылған
Түркия Президенті Режеп Тайып Ердоған елінде жер сілкінісі салдарынан қаза тапқандар саны 19 мыңнан асқанын жеткізді, деп хабарлайды Almaty-akshamy.kz Zakon.kz-ке сілтеме жасап.
Ердоған Малатья провинциясында брифинг өткізді.
"Жер сілкінісі ошағында болған 10 елдімекенде 19 388 адам қаза тапты. Зардап шеккендердің саны - 77 711", - деді ол.
Ердоғанның айтуынша, басқа елден келген құтқарушы топтарды қоса есептегенде, апат салдарын жоюда барлығы 141 мыңнан астам адам жұмылдырылған.
6 ақпанда таңертең Түркияда қатты жер сілкінісі болды. 7,8 балдық тағы бір зілзала кейінірек Түркияның орталық бөлігінде тіркелді.
Жер сілкінісі кезінде Түркияда болған қазақстандық Сабина Мамадьярова үйінділердің астында қалған. Ол аман-есен табылды, оның қолы сынғаны белгілі. Тағы екі отандасымыз - Әділет Қадырбеков пен Мирболат Құрмашев, өкінішке қарай, өлі табылды.