Жәрмеңке Шевченко көшесінің Пушкин және Қонаев көшелері арасындағы бөлігінде ұйымдастырылады, деп хабарлайды aqshamnews.kz тілшісі.
7 және 8 қараша Алматыда Абай облысының фермерлері мен тауар өндірушілері қатысатын ауыл шаруашылығы жәрмеңкесі өтеді. Қала тұрғындары азық-түлік өнімдерінің 20-ға жуық түрін орташа нарықтық бағадан 8–20%-ға төмен бағамен сатып ала алады.
Жәрмеңке Шевченко көшесінің Пушкин және Қонаев көшелері арасындағы бөлігінде ұйымдастырылады. Өндірушілер жалпы 100 тоннадан астам азық-түлік әкеледі.
Сатылымға сиыр, жылқы және қой еті, өсімдік майы, сүт өнімдері, қымыз, бал, құрт, бауырсақ, кондитерлік өнімдер және басқа да тауарлар шығарылады.
Өнімдер делдалдардың қатысуынсыз, тікелей өндірушілерден сатылады. Бұл тұрғындарға азық-түлікті қолжетімді бағамен сатып алуға, ал Абай облысының фермерлеріне өнім өткізу нарығын кеңейтуге мүмкіндік береді.
Жәрмеңке Алматының азық-түлік қауіпсіздігін қамтамасыз ету және Қазақстан өңірлерінен ауыл шаруашылығы өнімдерін тікелей жеткізуді дамыту жұмыстары аясында өткізіледі.