Биыл «Жұмысшы мамандықтар жылы» болып жарияланды. Бұл – еліміздегі еңбек нарығын дамытуға, сұранысқа ие мамандықтарды дәріптеуге және жастарды жұмыспен қамтуға бағытталған маңызды қадам. Осыған орай, еліміздің әр аймағында түрлі іс-шаралар ұйымдастырылып жатыр.
Біздің бастамамызды Алматы қаласының Білім және Жұмыспен қамту басқармалары қолдап, Принтмедиа технологиялар колледжімен бірлесіп, 40 жұмыс берушіні шақырдық. Олар 108 бос жұмыс орнын, жалпы 538 вакансияны ұсынып отыр. Бұл – жастар үшін, әсіресе биыл оқуын аяқтаған түлектер үшін үлкен мүмкіндік.
Қазіргі таңда медицина мен білім беру – ең тапшы мамандықтардың қатарында. Сол себепті, осы салаларға ерекше назар аударып отырмыз. Бүгінгі жәрмеңкеде өндіріс, қызмет көрсету, медицина және білім беру салалары бойынша көптеген жұмыс ұсынылды. Бұл жәрмеңке алғаш рет ұйымдастырылғанымен, біз мұндай кездесулерді тұрақты түрде өткізуді жоспарлап отырмыз.
Алдағы уақытта ашық есік күндерін ұйымдастырып, жоғары оқу орындары мен колледждерде кездесулер өткізуді көздеп отырмыз. Бұл арқылы студенттер мен түлектер жұмыс берушілермен тікелей танысып, еңбек нарығындағы сұраныстарды жақсы түсіне алады.