Алматы халқы өзі туған қаласының ұқыпты әрі таза болғанын қалайды. Осы мақсатпен сенбілік акциясы өтті.
28 Панфиловшылар саябағында алматылықтар сенбілікке шықты.
Аталған игі бастама республикалық «Таза Қазақстан» акциясының негізінде сондай-ақ «Алматы – біздің ортақ үйіміз» қалалық науқаны аясында жүзеге асырылды.
Мұның мақсаты – қала тазалығын сақтап, экологиялық ахуалды жақсарту.
«Біз өз шаһарымыздың әдемі, тап-таза болғанын қалаймыз. Ешқандай қоқыс көшеде, аулада шашылып жатпаса екен. Егер әр азамат өз маңайына ұқыпты қараса, экологиялық белсенділік арта түседі», – деді ерікті Жарас ЕРКІНБЕК.
Сонымен қатар аталған акцияға әр санаттағы адамдар да келіп қатысып, жаппай тазалыққа өз үлестерін тигізді.
«Бұрын Алматы жап-жасыл болатын. Көшедегі арықтардан су мөлдіреп ағатын. Тіпті апорт өскен кездер де есте. Бүгін қаланың шырайын кіргізу үшін көптеген істер жасалып жатыр. Әр іске береке берсін, қаламыз гүлдене бергей», – деді қала тұрғыны Қаржаубай АҚТАЗОВ.