Кездесуде тұрғындар көтерген тағы бір маңызды мәселе – тұрғын үй кешеніне қатынайтын толыққанды жолдың болмауы, деп хабарлайды aqshamnews.kz тілшісі.
Алматы әкімі Дархан Сатыбалды Алмалы ауданындағы «12 месяцев» тұрғын үй кешенінің тұрғындарымен кездесіп, оларды алаңдатқан мәселелерді талқылады. Кездесу барысында үйлердің шатырынан су ағуы, кешенге кіріп-шығатын жолдың жоқтығы және құрылыс салушының орындалмаған міндеттемелері көтерілді.
"Кешендегі үйлердің көпшілігінің шатырынан судың ағуы – тұрғындарды алаңдатып отырған негізгі мәселелердің бірі. Соның салдарынан жоғарғы қабаттағы пәтерлер зардап шегіп отыр. Түйткілді бақылауға алып, құрылыс салушы «Қазақстрой» ЖШС-нің анықталған кемшіліктерді толық жоюын талап етеміз, – деді тұрғындарға қала әкімі.
Кездесуде тұрғындар көтерген тағы бір маңызды мәселе – тұрғын үй кешеніне қатынайтын толыққанды жолдың болмауы. Бұл жағдай күнделікті көлік қозғалысын қиындатып қана қоймай, өрт сөндіру және жедел жәрдем сияқты шұғыл қызметтердің оқиға орнына уақытылы жетуіне де кедергі келтіруі мүмкін.
Сонымен қатар құрылыс салушы компанияның Мұратбаев көшесінің бойындағы бірінші қатарда орналасқан жеке тұрғын үйлерді сатып алу жөніндегі міндеттемесі әлі орындалмаған. Бұл мәселе жобаны іске асыру кезінде қарастырылғанымен, арада төрт жыл өтсе де, жұмыс аяқталмай отыр.
"Төтенше жағдайлар департаментіне Жол инфрақұрылымын дамыту басқармасымен бірлесіп, тұрғын үй кешені мен оған іргелес көшелерді тексеруді тапсырдым. Тексеру қорытындысы бойынша арнайы техниканың кедергісіз жетуіне жағдай жасау және тұрғындардың көлік қатынасын жеңілдету жөнінде нақты шаралар әзірленуі тиіс", – деді Дархан Сатыбалды.
Осылайша, «12 месяцев» кешеніндегі мәселелерді шешу үшін құрылыс салушының міндеттемелерін орындауы мен жол инфрақұрылымын реттеу мәселесіне назар аударылмақ.