Талғар қаласының әкімі Арыстанбек Әбілқайырұлы қызметінен кетті, деп хабарлайды Aqshamnews.kz тілшісі.
Бұл туралы қала әкімдігінің ресми парақшасында жарияланды. Мәліметке сәйкес, әкім өз еркімен өкілеттігін тоқтату туралы шешім қабылдаған. Ол мұны денсаулық жағдайымен байланыстырған.
Арыстанбек Әбілқайырұлының айтуынша, соңғы уақытта ем қабылдап, еңбек демалысына шығуға мәжбүр болған. Денсаулығы қызметтік міндеттерін толық әрі жауапкершілікпен атқаруға кедергі келтірмеуі үшін қызметінен кетуді дұрыс шешім деп санаған.
Еске салайық, ол 2024 жылдың желтоқсан айында өткен сайлау нәтижесінде Талғар қаласының әкімі болып тағайындалған еді. Бұл қызметті 1 жыл 2 ай атқарды.