Алматыда үй кезегінде тұрған халықтың әлеуметтік осал тобына жататын үшінші лектің 105 тұрғынына жалдамалы пәтердің кілті табысталды, деп хабарлайды аlmaty-akshamy.kz.
Наурызбай ауданының «Шұғыла» шағынауданындағы «Alem City-2» тұрғын үй кешенінде орналасқан 5 үйден кезекте тұрғандарға 105 пәтердің кілті табысталды. Олардың ішінде 43 пәтер 1 бөлмелі, 62 пәтер 2 бөлмелі.
ХӘОТ санаттары бойынша: жетім балалар – 30, 1 және 2 топтағы мүгедектер – 8, жеңілдіктері бойынша ҰОС-ға теңестірілген ардагерлер – 1, мүгедектігі бар балаларды тәрбиелеп отырған отбасы – 6, зейнеткерлер – 8, толық емес отбасылар – 52.
Бірер күн бұрын ХӘОТ санатындағы кезекте тұрған бірініші лектегі 124 адамға және екінші лектің 164 тұрғынына пәтер кілті табысталған болатын. 
Баспаналы болған жандарды Алматы қаласы Коммуналдық инфрақұрылымды дамыту басқармасы басшысының орынбасары Ғалымжан Әбдішүкірұлы құттықтап, жалдамалы пәтерлер қаланың коммуналдық тұрғын үй қорынан бөлінгенін хабарлады. Ал қала тұрғыны Виктория Гришина баспана кезегіне 2015 жылы тұрғанын айтады.
- Маған ұялы телефонға қоңырау шалып, пәтердің иесі болғанымызды айтты. Басында мүлдем сенбедім. Біз үшін бұл нағыз бақыт әір тосын сый! Ұлымды жалғыз тәрбиелеп отырмын, сондықтан мен үшін мемлекеттен үлкен қолдау болды. Кезекке 2015 жылы тұрдым, - деді Виктория Гришина.