Қазақстан ұлттық құрамасының бас бапкері Станислав Черчесов баспасөз конференциясында қазақстандық журналистке бағыттаған әзіліне қатысты пікір білдірді. Бұл туралы ол «Спорт-экспресс» басылымына берген сұхбатында айтты.
«Әрдайым көпшілік алдында сөйлегенде, сөзімнің мағынасын толық түсінемін. Егер менің әзілім дұрыс қабылданбаса, демек, қателік менде», — деді Черчесов.
Бұған дейін интернетте ұлттық құраманың бапкері Станислав Черчесовтың казах тіліне қатысты реніш туғызатын пікір білдіргені жайлы видео тараған еді. Бұл жағдай қоғамда үлкен дау тудырып, Қазақстанның Мәдениет және спорт министрлігі Федерациядан түсініктеме талап етті.
Қазақстан футбол федерациясы бас бапкермен әңгіме жүргізіліп, оған 200 АЕК көлемінде (738 400 теңге) айыппұл салынғанын мәлімдеді.