Дәрігерлер ұлттық киіммен келіп, тосын сый жасады
ШҚО-да Наурыз қарсаңында жаңа туған сәбилер перзентханадан ұлттық киіммен шығарылып жатыр, деп хабарлайды Almaty-akshamy.kz Altaynews сайтына сілтеме жасап.
Мұндай шараны Аягөз ауданаралық ауруханасы мерекелік көңіл-күй үшін ұйымдастырған.
Перзентханадан шығатын алғашқы 10 нәрестеге ұлттық киім кигізіп, ерекше дәстүрмен үйлеріне шығарып салынды. Бұған аналар да қуанышты.
«Бұл дүние есігін ашу үшін тамаша уақыт. Наурыз – табиғат жаңарғанда тойланатын ұлы мейрам. Дәрігерлер ұлттық киіммен келіп, бізге тосын сый жасады», - дейді төртінші рет ана атанып отырған Ақмарал Закирьянова.
Аягөз ауданаралық аурухананың бас дәрігері Шалқар Омаровтың айтуынша, Наурыз мерекесі қарсаңында балаларды ұлттық нақыштағы киіммен шығару дәстүрге айналған.
«Жуықта туылған нәрестелермен бірге айдың басында дүниеге келген егіз сәбиді шығардық. Олардың салмағы – 1200 және 1300 грамм ғана. Бірақ денсаулықтары жақсы. Күтімнің арқасында нәрестелер салмақ жинап отыр, оларға неонатологиялық көмек толық көрсетілді. Бұл үшін біздің аудандық аурухананың барлық әлеуеті бар», - дейді бас дәрігер.
Дәл осындай дәстүр аймақтың тағы бір аудандық ауруханасында енгізіліп отыр. Тарбағатау аудандық №2 ауруханасы да Наурыз мейрамы кезінде мерекелік көңіл-күй сыйлауға бел буған екен.