Алматы қаласының Жұмыспен қамту және әлеуметтік бағдарламалар басқармасына қарасты КММ «Сенім» әлеуметтік қызметтер орталығында голболдан спорттық іс-шара ұйымдастырылды.
Голбол - көру қабілеті бұзылған балалар мен ересектерге арналған командалық спорт ойыны. Ойын барысында ішінде қоңырауы бар арнайы доптар қолданылады, бұл ойыншыларға доптың орнын дыбыс арқылы анықтауға мүмкіндік береді.
«Қалалық оқу-тәжірибелік дене шынықтыру және спорт орталығы» ұйымдастырған «Қалалық инклюзивті ойындар» аясында Орталықтың қызмет алушылары жарысқа қатысып, II орынға ие болды.
Іс-шара белсенді әрі достық атмосферада өтіп, қатысушылардың командалық рухын, физикалық белсенділігін және эмоционалдық жай-күйін дамытуға ықпал етті.
Бейімделген спорт түрлерімен айналысу қатысушылардың еңбекқорлығын, ерік-жігерін, табандылығын және мақсатқа ұмтылысын қалыптастыруға көмектеседі, сондай-ақ олардың әлеуметтік бейімделуіне және қоғамдық өмірге белсенді араласуына жағдай жасайды.
КММ «Сенім» әлеуметтік қызметтер орталығы 3 жастан 18 жасқа дейінгі психоневрологиялық патологиялары және тірек-қимыл аппараты бұзылған мүгедектігі бар балаларға стационар жағдайында арнайы әлеуметтік қызметтер көрсетеді. Орталықта қызметтердің 8 түрі ұсынылады: әлеуметтік-тұрмыстық, әлеуметтік-медициналық, әлеуметтік-психологиялық, әлеуметтік-педагогикалық, әлеуметтік-еңбек, әлеуметтік-мәдени, әлеуметтік-құқықтық және әлеуметтік-экономикалық қызметтер.
Осындай спорттық іс-шараларды өткізу КММ «Сенім» әлеуметтік қызметтер орталығының қызметіндегі маңызды бағыттардың бірі болып табылады және қызмет алушылардың белсенді демалысын ұйымдастыруға, денсаулығын нығайтуға және өмір сапасын арттыруға бағытталған.
