Президент Жамбыл облысы Байзақ ауданындағы адам өліміне әкеп соқтырған қайғылы оқиғаға байланысты 29 тамызды Жалпыұлттық аза тұту күні деп жариялады. Жалпыұлттық аза тұту орынды, әрине! Бұл орайда Президентіміздің бұл шешімі парасатты іс болды деп есептеймін.
Төтенше жағдайға байланысты шұғыл өткізілген басқосуда қаза болған әскери қызметшілер мен құтқарушылардың ерен ерліктері, жанқиярлық әрекеттері сөз болды. «Ерлеріміздің есімі ел жадында мәңгі сақталады» деп Мемлекет басшысы атап айтты.
Көпті көрген көнекөз және қазақ елінің жанашыры, батагөй ақсақалы ретінде менің пікірім – алдағы уақытта мұндай оқиғаға жол берілмеудің нақты шаралары жасалуы керек. Ауыр әрі ащы болса да айтайын, Арыс жарылысынан сабақ алмаған сияқтымыз.
Жүздеген бейбіт халықты, әскерилерді қазаға ұшыратқан, қайғыға душар еткен сол Арыстағы оқиға бізге сабақ болу керек-ақ еді…