Еуразиядағы ең биік саналатын Ключевская жанартауы атқылай бастады, деп хабарлайды Almaty-akshamy.kz.
Бұл туралы ресейлік ТАСС агенттігіне Жанартаулардың атқылауын бақылайтын камчаткалық топтың (KVERT) жетекшісі, Ресей ғылым академиясы Қиыр Шығыс бөлімінің Вулканология және сейсмология институтының ғылыми қызметкері Ольга Гирина хабарлаған, деп жазды ҚазАқпарат.
«Жанартаудың жай ғана жарқырауы емес, стромболиялық типтегі ең жоғары жарылғыш атқылау тіркелді. Әзірге мұндай атқылау ешкімге қауіпті емес: халық үшін де, авиация үшін де», - деді Ольга Гирина.
Ключевская - континенттегі ең белсенді жанартау, оның биіктігі - 4750 метр. Жанартаудың соңғы рет атқылауы 2020 жылдың қазан айында болды. Ең жақын елді мекен - Усть-Камчатский ауданы, Ключи ауылы - жанартау баурайында, кратерден 30 шақырым қашықтықта орналасқан.