Бүгін, 18 ақпанда, Италияда өтіп жатқан қысқы Олимпиада ойындарында Қазақстан құрамасынан сегіз спортшы бағдарламаның төрт түрі бойынша өнер көрсетеді, – деп хабарлайды aqshamnews.kz тілшісі.
Жарыс күні біздің команда үшін шаңғы трассасынан басталады: Дарья Ряжко мен Надежда Степашкина әйелдер арасындағы командалық спринтке қатысады (басталуы 13:45). Ал Наиль Башмаков пен Амирғали Мұратбеков ерлер арасындағы командалық спринтте сынға түседі (14:15).
Тікелей эфир «Хабар» телеарнасынан және оның ресми сайтынан көрсетіледі.
14:00-де шаңғы фристайл-акробатикасы мен тау шаңғысындағы слалом жарыстары басталады. Фристайлда Қазақстан намысын Аяна Жолжас қорғаса, слаломда Александра Скороходова жарыс жолына шығады. Трансляция Qazsport сайтында, сондай-ақ Jibek Joly арнасында қолжетімді болады.
18-інен 19 ақпанға қараған түні шорт-тректен 500 метр қашықтықта ширек финал, жартылай финал және финал өтеді. Қазақстандық екі спортшы Абзал Әжіғалиев пен Денис Никиша іріктеуден өтіп, жүлде үшін күресті жалғастырады.
Тікелей эфир Qazsport арнасында 00:15-те басталады.
Еске салайық, Абзал Әжіғалиевтің Олимпиадада ширек финалға шығуы өз жарысындағы ерекше мәреге байланысты әлеуметтік желіде кең тараған. Ал мәнерлеп сырғанаушы Софья Самоделкина кеше Олимпиададағы алғашқы өнер көрсетуін өткізді.