Шаһар басшысы Дархан Сатыбалды бүгін жол инфрақұрылымы нысандарын жұмыс барысымен аралағаны жайында инстаграм парақшасына жазды, – деп хабарлайды aqshamnews.kz тілшісі.
"Бүгін жол инфрақұрылымы нысандарын жұмыс барысымен аралап шықтым. Абай даңғылы мен Саин көшесін ҮАААЖ-ға дейін ұзарту жұмыстарының барысымен, сондай-ақ қаланың көше-жол желісін кеңейту жобаларымен таныстым", деп жазды әкім.
Абай даңғылы мен Саин көшесінде жұмыс жоспарға сәйкес жүргізілуде. Сатып алынған жер телімдерін босату, инженерлік коммуникацияларды көшіру және жол төсемінің негізін салу жұмыстары жалғасып жатыр. Міндет – жыл соңына дейін көлік қозғалысын қамтамасыз ету.
Радиалды жолдарды ҮАААЖ-ға дейін ұзарту – Алматы мен агломерациясының көлік инфрақұрылымын дамытудың маңызды бөлігі. Бұл жобалар Мемлекет басшысының тапсырмасына сәйкес қолға алынған.
"Сондай-ақ, қала ішіндегі жобаларды – Жұбанов көшесін, Солтүстік айналма жолды, Хмельницкий және Мұқанов көшелерін ұзарту жұмыстарын қарап шықтым. Бұл жобалар бойынша құрылыс жұмыстарын бастау үшін жер телімдерін сатып алу мен инженерлік желілерді көшіру жұмыстарын жеделдетуді тапсырдым."
Қаланың өсіп келе жатқан көлік жүктемесін ескере отырып, жол желісін дамыту жұмыстары кешенді түрде жүргізілуде.