Республика күніне орай Алматы халықаралық әуежайында туристерге қазақстандық шоколад ұсынылады, деп хабарлайды aqshamnews.kz
2024 жылдың 25 қазанында Республика күніне орай Алматы қаласының Туризм басқармасы, Алматы халықаралық әуежайы және ҚР ҰҚК Шекара бақылау басқармасы бірлесіп «Қонақтарға тәтті сый» акциясын ұйымдастырады. Бұл шара барысында паспорттық бақылаудан өтетін қала қонақтарына қазақстандық шоколад ұсынылады.
Мерекелік акция 45-тен астам рейс пен 5 мыңға жуық жолаушыны қамтиды. Сонымен қатар, әуежай аумағында ұлттық мереке туралы ақпараттық баннерлер орнатылып, Алматыға келген қонақтар батырлармен және ұлттық киімдегі арулармен суретке түсе алады.
Бұл акция Алматының елдегі ең ірі туристік орталықтардың бірі ретіндегі беделін нығайтуға бағытталған маңызды қадам. Іс-шараның мақсаты – туристерге жылы шырай танытып, жағымды әсер қалдыру, сондай-ақ халықаралық қонақтарға Қазақстанның тарихы мен рухани құндылықтарына деген құрметті көрсету.